Суд у Тэгеране прысудзіў да смяротнага пакарання аднаго з удзельнікаў пратэстаў, якія пачаліся ў краіне пасля смерці 22-гадовай Махсі Аміне. Гэта пакаранне стала першым прысудам, вынесеным удзельнікам дэманстрацый.
Імя падсуднага не паведамляецца, але вядома, што ён быў прызнаны вінаватым у падпале ўрадавага будынка, парушэнні грамадскага парадку, а таксама «стварэнні пагрозы нацыянальнай бяспецы». Акрамя таго, яго абвінавацілі ў «карупцыі» і «махарэбі» — «вайне супраць Бога».
Апошняе кваліфікуецца іранскім заканадаўствам як асабліва цяжкае злачынства і можа карацца смяротным пакараннем нават без іншых абвінавачванняў.
У той жа час на іншым пасяджэнні суда ў Тэгеране на розныя тэрміны пазбаўлення волі былі асуджаныя яшчэ пяць пратэстоўцаў — іх абвінавачвалі ў «змове з мэтай учынення злачынстваў супраць нацыянальнай бяспекі» і «парушэнні грамадскага парадку».
Абвінавачаных асудзілі на тэрміны ад пяці да дзесяці гадоў зняволення, яны маюць права падаць апеляцыю.
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер15
Каментары