Дзеянне фільма, які цяпер здымаюць у Гродне, разгортваецца ў 1989-1990 гады, калі ў СССР поўным ходам ішоў працэс перабудовы. Як паведамляе «Вечерний Гродно», расійскі 12-серыйны гістарычны дэтэктыў пад працоўнай назвай «ГДР» заснаваны на рэальных падзеях.
«Як адзначаюць стваральнікі карціны, у ёй выразна паказана, як падзеі перабудовы прыводзяць да незваротных наступстваў, уключаючы развал Савецкага Саюза», — гаворыцца ў паведамленні.
Па сюжэце галоўны герой, разведчык Аляксандр Нячаеў, апынуўся ў цэнтры аперацыі, арганізаванай спецслужбамі некалькіх краін. За месяцы, праведзеныя ў Берліне ў момант злому ўсёй камуністычнай сістэмы, Нячаеў моцна мяняецца. Ён ужо не ведае, хто сябар, а хто здраднік, але «працягвае адстойваць гонар і інтарэсы сваёй Радзімы».
Вытворчасцю кінакарціны займаецца АТ «Сусветныя рускія студыі» пры ўдзеле тэлекампаніі НТВ, анлайн-кінатэатра Wink і «НМГ студыі».
Здымачная пляцоўка разгарнулася ў цэнтры Гродна. На ўчастку вуліцы Ажэшка ад аблвыканкама да ЗАГСа з'явіліся дэкарацыі часоў ГДР. Тут усталявалі тэлефонныя будкі, газетныя кіёскі, змянілі шыльды і прыгналі нямецкія аўто.
Каментары