У Акадэміі навук працуюць над 15-томным тлумачальным слоўнікам беларускай мовы
Навукоўцы НАНБ працуюць над 15-томным тлумачальным слоўнікам беларускай мовы, паведаміў дырэктар Інстытута мовазнаўства Ігар Капылоў падчас прэс-канферэнцыі «Развіццё і папулярызацыя сучаснай беларускай мовы», прымеркаванай да Міжнароднага дня роднай мовы.
«Мы працуем над стварэннем новага фундаментальнага Тлумачальнага слоўніка беларускай мовы ў 15 тамах. У найбліжэйшай перспектыве першы том павінен выйсці ў свет.
Слоўнік будзе налічваць больш чым 250 тысяч слоў — такога аб'ёму ў нас яшчэ не было.
Ён будзе адлюстроўваць лексічнае багацце з улікам тых змен, якія адбыліся ў апошнія дзесяцігоддзі ў сувязі з сацыяльна-эканамічнымі, палітычнымі зменамі, у культурным жыцці. Думаю, гэта будзе вельмі важнай падзеяй», — сказаў Ігар Капылоў.
У 2022 годзе выйшаў з друку Тлумачальны слоўнік беларускай літаратурнай мовы ў двух тамах. Яго аб'ём — каля 65 тысяч слоў. Там улічаныя змены, зафіксаваныя запазычанні, якія трапілі ў беларускую мову, тыя словы, за кошт якіх папоўніўся лексічны склад мовы ў апошнія дзесяцігоддзі.
Вядзецца таксама даследаванне мовы ХІХ стагоддзя. «Так сталася, што да гэтага часу недастаткова была даследаваная мова 19 стагоддзя, — адзначыў Ігар Капылоў. — Ідзе праца па стварэнні Тлумачальнага слоўніка ХІХ стагоддзя і ўжо фактычна створаныя слоўнікі асобных пісьменнікаў. У першую чаргу маю на ўвазе Дуніна-Марцінкевіча».
Каментары