Беларус, якому не далі ваяваць за Украіну, падаў у суд на СБУ і прайграў
Адзін з судоў Кіева адмовіў грамадзяніну Беларусі, які хацеў ваяваць на баку Украіны ў складзе беларускага нацыянальнага падраздзялення, у скасаванні пастановы Службы бяспекі Украіны аб прымусовым вяртанні ў краіну паходжання або трэцюю краіну, заўважыла «Радыё Свабода».
Пасяджэнне суда прайшло 16 сакавіка ў закрытым рэжыме, але рашэнне па яго выніках апублікавалі толькі цяпер.
У кастрычніку 2022 года Служба бяспекі Украіны правяла апытанне грамадзяніна Беларусі з выкарыстаннем паліграфа і па яго выніках рэкамендавала яму пакінуць тэрыторыю Украіны да 23 кастрычніка 2022 года. Беларус, у сваю чаргу, звярнуўся ў суд з просьбай скасаваць гэта рашэнне.
У судовым рашэнні адзначаецца, што падчас апытання пры дапамозе паліграфа супрацоўнікі СБУ атрымалі звесткі, якія сведчаць «аб магчымым знаходжанні беларуса ў агентурным апараце спецслужбаў або праваахоўных органаў Беларусі і выкананні задач на шкоду нацыянальнай бяспецы Украіны».
«Улічваючы варожае стаўленне Рэспублікі Беларусь да Украіны, было прапанавана органу вайсковага ўпраўлення Узброеных сіл Украіны адмовіць грамадзяніну Беларусі ў праходжанні вайсковай службы ў нацыянальных вайсковых фармаваннях Украіны, так як знаходжанне грамадзян Беларусі, якія скампраметаваныя супрацай з нацыянальнымі спецслужбамі, на тэрыторыі Украіны, стварае пагрозу дзяржаўнай бяспецы», — патлумачылі прадстаўнікі СБУ на судовым пасяджэнні.
Па выніках апытання супрацоўнікі СБУ таксама нібыта выявілі ў беларуса прыкметы «дэвіянтных паводзін» і «дэзадаптацыйныя схільнасці, якія могуць ускладніць знаходжанне гэтай асобы ў шэрагах Узброеных сіл Украіны і прывесці да цяжкіх наступстваў».
Суд палічыў, што атрыманая падчас контрвыведнай праверкі інфармацыя сведчыць аб «учыненні беларусам дзеянняў, якія супярэчаць інтарэсам забеспячэння нацыянальнай бяспекі Украіны і аховы грамадскага парадку», і з'яўляецца дастатковай падставай для прымусовага вяртання беларуса ў краіну паходжання ці трэцюю краіну.
У апублікаваным судовым рашэнні, згодна з заканадаўствам Украіны аб ахове персанальнай інфармацыі, замест прозвішча беларуса выкарыстоўваецца фармулёўка «АСОБА_1».
Летась у кастрычніку стала вядома, што з Украіны вымушаныя былі выехаць два беларускія добраахвотнікі — былы палітвязень Ціхан Клюкач і баец з пазыўным «Карыч». Апошняга СБУ нібыта і западозрыла ў супрацы з КДБ Беларусі.
Цяпер чытаюць
У Мінску адбыліся масавыя затрыманні выдаўцоў і кнігараспаўсюднікаў29
Каментары