Эрдаган запатрабаваў за падтрымку ўступлення Швецыі ў НАТА прыёму Турцыі ў Еўрасаюз
Прэзідэнт Турцыі Рэджэп Таіп Эрдаган паставіў новую ўмову для ўступлення Швецыі ў НАТА: ён запатрабаваў «адкрыць для Турцыі шлях у ЕС». Пра гэта ён сказаў усяго за некалькі гадзін да пачатку саміту Альянсу ў Вільні.
Акрамя таго, Эрдаган паабяцаў агучыць гэтую самую пазіцыю на сустрэчы з прэм'ер-міністрам Швецыі Ульфам Крыстэрсанам і генеральным сакратаром НАТА Енсам Столтэнбергам.
«Я звяртаюся да тых краін, якія прымушаюць Турцыю ўжо больш за 50 гадоў чакаць перад дзвярыма ў Еўрасаюз. Спачатку адкрыйце шлях для Турцыі ў ЕС, а затым мы адкрыем шлях для Швецыі ў НАТА, як ужо зрабілі для Фінляндыі», — заявіў турэцкі прэзідэнт перад адпраўленнем у Вільню, паведамляе Reuters.
Эрдаган не ўдакладніў, што менавіта ён меў на ўвазе пад словамі «адкрыць шлях» у ЕС. Прэс-сакратарка Еўракамісіі Дана Спінант заявіла, што не варта звязваць два розныя працэсы: уступленне Швецыі ў НАТА і Турцыі — у Еўрасаюз.
«У ЕС вельмі структураваны працэс пашырэння, і ёсць вельмі выразны набор крокаў», — заявіла яна журналістам у Бруселі, паведамляе Bloomberg.
Турцыя імкнецца ўступіць у ЕС з 1980-х гадоў. Афіцыйныя перамовы пачаліся яшчэ ў 2005 годзе, аднак ужо даўно зайшлі ў тупік. Прычыны рознагалоссяў — правы чалавека ў Турцыі, незалежнасць судовай сістэмы і разведка Анкарой энергетычных рэсурсаў у спрэчных водах вакол Кіпра.
Швецыя падала заяўку на ўступленне ў НАТА летась разам з Фінляндыяй пасля ўварвання Расіі ва Украіну. З-за складанасцяў у дасягненні згоды паміж Анкарой і Стакгольмам Фінляндыя ўступала ў блок самастойна і стала паўнапраўным сябрам Альянсу ў красавіку гэтага года.
Цяпер чытаюць
Пяць дзён, 60 удзельнікаў, саўна, більярд і крыкі адзін на аднаго. Расказваем, як прайшла закрытая «гульня Мацкевіча»9
Пяць дзён, 60 удзельнікаў, саўна, більярд і крыкі адзін на аднаго. Расказваем, як прайшла закрытая «гульня Мацкевіча»
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары