Са скаладромам і залай бокса. Комплекс «Дынама» на вуліцы Даўмана адкрыюць у маі пасля рэканструкцыі
Знакамітага кніжнага кірмашу тут не будзе. Не будзе і выстаў жывёл.
У спартыўным комплексе «Дынама», размешчаным на вуліцы Даўмана, пасля рэканструкцыі будуць займацца каля 2 000 дзяцей са спартыўных школ «Дынама» па 12 відах спорту, пішуць «Мінск-Навіны».
Рэканструкцыя спарткомплексу пачалася ў маі 2024 г. Да апошняга моманту тут трэніраваліся прадстаўнікі праваахоўных ведамстваў, выхаванцы спартыўных школ Беларускага фізкультурна-спартыўнага таварыства «Дынама», паралімпійцы. Усяго займаліся каля паўтары тысячы спартсменаў, не лічачы прыхільнікаў актыўнага ладу жыцця.
Перш за ўсё цалкам замянілі камунікацыі. Правялі перапланіроўку.
Ад ранейшага будынка застаўся толькі каркас: будынак захаваў ранейшыя габарыты, але напаўненне стала сучасным.
Павялічылася колькасць пляцовак, з’явілася магчымасць займацца новымі відамі спорту. А на фасадзе будынка красуецца фірмовая літара «Д» у ромбе.
На вуліцы, акрамя футбольнага поля і тэнісных кортаў, з’явілася варкаўт-пляцоўка. Ёсць яшчэ адна — універсальная, якую можна выкарыстоўваць для міні-футбола, валейбола і баскетбола. Разглядаецца магчымасць узвядзення побач са спарткомплексам асобнага будынка ціра: ён неабходны для падрыхтоўкі прафесійных спартсменаў, выхаванцаў СДЮШАР, прадстаўнікоў сілавых структур. Таксама вывучаецца перспектыва ўладкавання кортаў для новага і папулярнага напрамку — падэл-тэніса.
Змяніліся і самі залы. У лёгкаатлетычным манежы цяпер можна праводзіць трэніроўкі па васьмі відах спорту. На «ядры» ўкладзена паркетнае пакрыццё і нанесена разметка для гульнявых відаў: міні-футбола, гандбола, валейбола, баскетбола.
Тут дзве пляцоўкі памерам 20 × 40 м, іх раздзяляе спецыяльная сетка. Памяшканне прызначана для заняткаў амаль усімі лёгкаатлетычнымі дысцыплінамі, за выключэннем кідковых. Даўжыня бегавых дарожак (іх чатыры) складае стандартныя 400 м, ёсць яма для скачкоў і сектар для скачкоў у вышыню. Абсталяваны фехтавальныя дарожкі: дзве з іх знаходзяцца на першым паверсе, яшчэ некалькі — на другім.
Юныя рапірысты ўжо трэніруюцца.
Яшчэ адно новаўвядзенне — скаладром. Перш за ўсё на ім будуць трэніравацца дзеці. Новым абсталяваннем, як чакаецца, скарыстаюцца выхаванцы адной з мінскіх спортшкол, а крыху пазней (ёсць такія планы) у СДЮШАР «Дынама» адкрыюць аддзяленне па скалалажанні і правядуць набор у групы, бо гэта алімпійскі від спорту.
Што да адзінаборстваў, з’явілася магчымасць асобна працаваць з барацьбітамі і ўдарнікамі — раней было толькі адно памяшканне. На другім паверсе ўкладзены дываны-маты: там адпрацоўваюць прыёмы і абарону ад іх. На першым паверсе адкрылася зала бокса: усталяваны стацыянарны рынг і ўсё неабходнае абсталяванне. Тут будуць удасканальваць навыкі і ў службова-прыкладных відах, напрыклад у рукапашным баі.
Зала мастацкай гімнастыкі адкрылася адной з першых: падрыхтоўка юных грацый аднавілася з сакавіка. Да гэтага дзяўчаты трэніраваліся ў «Чыжоўка-Арэне». Для іх уладкаваны новыя памосты і дываны.
Універсальную залу плануюць выкарыстоўваць як для трэніровак, так і для афіцыйных матчаў па міні-футболе, гандболе, баскетболе і валейболе. Жадаючых займацца тут шмат — кажуць, час ужо распісаны нават на позні вечар.
У «Дынама» створана безбар’ернае асяроддзе. Паралімпійцы трэніраваліся тут і раней, а каб забяспечыць ім доступ на другі паверх, усталявалі два ліфты. Акрамя таго, ва ўсіх залах з’явіліся інфармацыйныя таблічкі са шрыфтам Брайля.
Знакаміты начны кніжны кірмаш у спарткомплекс «Дынама» не вернецца.
Не будуць тут праводзіць і выставы жывёл. Аб’ект цалкам задзейнічаюць для заняткаў спортам.
Цяпер чытаюць
Лукашэнка: Што творыцца ў краіне, у нас усе гэтую гусь круцяць31
Лукашэнка: Што творыцца ў краіне, у нас усе гэтую гусь круцяць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5858
Каментары