У Гомелі сталі штрафаваць за вераб’ёў, якіх «утрымліваюць» у крамах
Адміністрацыю гомельскага гіпермаркета ўжо не першы раз аштрафавалі за птушак, якія лётаюць пад ягоным дахам, паведамляе выданне «Штодзень».
Пад вельмі высокімі столямі гіпермаркетаў часам можна пабачыць вераб’ёў ці нават галубоў. Яны звычайна без праблем трапляюць пад скляпенні вялікіх будынкаў і вельмі камфортна там сябе адчуваюць.
У гомельскім гіпермаркеце на вуліцы Гагарына вераб'і адчувалі сябе зусім раскошна. Ужо некалькі гадоў у сацсетках рэгулярна з’яўляюцца відэа, дзе птушкі раз-пораз ласуюцца свежай гароднінай, ягадамі і крадуць час ад часу ў краме арэхі або крупы.
Гэтымі днямі хтосьці з пакупнікоў напісаў у санстанцыю скаргу на птушак, якіх «утрымліваюць у гіпермаркеце».
У адказ на гэта з мэтай «ліквідаваць парушэнне санітарных нормаў і правілаў» супрацоўнікі ўпраўлення гандлю і паслуг Гомельскага гарвыканкама разам з супрацоўнікамі Гомельскага гарадскога цэнтра гігіены і эпідэміялогіі «правялі наглядныя мерапрыемствы» і сапраўды «выявілі там факт утрымання птушак».
У справаздачы чыноўнікаў аб праведзенай працы адзначана, што птушак, якія «былі ў краме на ўтрыманні», «злавілі і адпусцілі ў натуральнае асяроддзе пражывання».
Пры гэтым на адміністрацыю гіпермаркета завялі справу паводле адміністрацыйнага артыкула 17.5 (парушэнне санітарна-эпідэміялагічных патрабаванняў), штраф паводле якога прадугледжаны да 30 базавых велічынь, то-бок 1 110 беларускіх рублёў.
Праўда, зусім выгнаць птушак з такіх будынкаў складана, а адміністрацыю гэтага самага гіпермаркета нядаўна ўжо штрафавалі за гэтых самых вераб’ёў. Ці змогуць яны даць рады праблеме ў будучыні — пакажа час.
Памерла 39-гадовая экс-палітзняволеная Ганна Кандраценка. У калоніі ў яе знайшлі рак, але не вызвалілі27
Каментары
Что стало с людьми?...
Были же люди как люди, но постепенно превратились в быдло.
Калі не спрацуе з коцікамі, можна падсяліць у гіпер драпежных птушак, якіх баяцца вераб'іныя. Паветраныя баталіі з удзелам катоў, вераб'ёў і каршукоў абавязкова прыцягнуць пакупнікоў.