«Разлічваць няма на што». Адміністрацыя Трампа замарозіла фінансаванне стыпендый, па якіх вучацца ў тым ліку і беларусы
У лютым 2025 года адміністрацыя Дональда Трампа замарозіла фінансаванне для шэрагу адукацыйных і культурных праграм — як для замежнікаў, так і для амерыканцаў. Праблемы закранулі і беларускіх студэнтаў у ЗША.
Дзяржаўны дэпартамент ЗША замарозіў фінансаванне вядомых амерыканскіх праграм абмену — Фулбрайт, стыпендыі Гілмана, стыпендыі Critical Language і IDEAS.
Планавалася, што паўза ў фінансаванні працягнецца 15 дзён, але дагэтуль сітуацыя застаецца нявызначанай. Некаторыя міжнародныя студэнты атрымліваюць свае выплаты пазней, чым звычайна, нехта ў выніку мае на руках суму значна меншую за тую, якая павінна быць.
Вераніка (імя зменена — НН), беларуская стыпендыятка праграмы Фулбрайт, расказала «Нашай Ніве», што за сакавік ёй і іншым студэнтам выплаты затрымалі. Каардынатары праграмы паведамілі, што фінансаванне замарожана: за красавік маладыя людзі яшчэ атрымалі стыпендыі авансам, а што будзе далей — невядома.
«У мяне пра гэта шмат пачуццяў. Разлічваць асабліва няма на што. Хіба што на тое, што сітуацыя вырашыцца хутка — я ведаю, што некаторыя навуковыя гранты размарозілі. Можна падавацца на экстраннае фінансаванне ад універа, ёсць яшчэ экстранны крэдыт, але гэта апошняе, на што хочацца ісці».
Праз скарачэнні сярод адміністратараў праекта студэнтам цяжка атрымаць дазволы на працу, каб прынамсі часткова закрываць свае патрэбы. Па візе, якая ў Веранікі, ёй тэарэтычна могуць дазволіць працаваць толькі 20 гадзін на тыдзень і толькі па спецыяльнасці ці на кампусе ўніверсітэта.
«Ім сапраўды прыйшлося скараціць людзей — пра гэта пару тыдняў таму нам таксама прыслалі ліст. І цяпер у арганізацый, якія займаюцца адміністраваннем гранта, няма магчымасцяў, каб апрацоўваць дакументы. Гэта значыць, што атрымаць дазвол на працу ад Фулбрайта зараз амаль немагчыма — яны так і напісалі на сваім партале для стыпендыятаў», — кажа дзяўчына.
Іншыя стыпендыяты апынуліся ў такой жа сітуацыі, што і Вераніка, але дэталі ва ўсіх адрозніваюцца: праз спецыфіку навучальнай праграмы ці ўніверсітэта.
«Наша Ніва» звярнулася па каментарый да беларускага аддзялення EducationUSA, якое кансультуе абітурыентаў па паступленні ў ЗША, але там аператыўнага адказу атрымаць не ўдалося.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску20
Каментары