За некалькі дзён да вызвалення на палітзняволеную Кульшу завялі новую крымінальную справу — чацвёрты раз
Вікторыю Кульшу абвінавачваюць у непадпарадкаванні. Цяпер яна ў СІЗА Гомеля.
Палітвязня Вікторыю Кульшу перавялі ў СІЗА Гомеля. Яна павінна была выйсці на волю 6 красавіка. Але на яе ў чацвёрты раз завялі крымінальную справу па арт. 411 — гэта пятая крымінальная справа супраць яе і чацвёртая менавіта па гэтым артыкуле, піша dissident.by
Вікторыя Кульша была адміністратаркай чата «Кіроўцы 97%», за што была затрыманая 4 лістапада 2020. У выніку яе асудзілі на 2,5 года пазбаўлення волі. У чэрвені 2022 Вікторыю Кульшу ўпершыню асудзілі па арт. 411 (злоснае непадпарадкаванне законным патрабаванням адміністрацыі папраўчай установы). На той момант у яе было ўжо 34 спагнанні.
Чарговы суд над жанчынай распачаўся ў красавіку 2023 года, дзе ёй зноў прысудзілі яшчэ адзін год зняволення. А ў кастрычніку 2023 года Вікторыю Кульшу асудзілі трэці раз і зноў дадалі 1 год па 411 артыкуле. Да гэтага часу жанчына правяла 7 месяцаў у СІЗА і павінна была выйсці на волю 6 красавіка 2025 года. Але супраць Вікторыі ўзбудзілі чацвёртую крымінальную справу. Зараз блізкія да ейнай сям'і паведамляюць, што яна знаходзіцца ў СІЗА-3.
Агулам Вікторыя ўжо адбыла ў зняволенні 70 сутак ШІЗА і 6 месяцаў у ПКТ. Таксама вядома, што супрацоўнікі жаночай калоніі № 24 у Зарэччы ўжывалі супраць жанчыны псіхалагічны і фізічны ціск. Паведамляецца, што адзін з наглядчыкаў душыў Вікторыю локцем, стоячы ззаду, а таксама цягнуў яе па камеры. Апроч гэтага, яе часта абражалі і прыніжалі перад іншымі наглядчыкамі.
У сваіх інтэрв'ю былая палітзняволеная Паліна Шарэнда-Панасюк згадвала пра Вікторыю: «У Вікторыі Кульшы, напэўна, ужо адмовілі ныркі. Яна трымала галадоўкі месяцамі, адмаўлялася ад вады і ежы. Яна ўскрывала сабе вены. Яе кідалі за гэта ў ШІЗА — і там яна зноў ускрывала сабе вены. Яна трымала галадоўкі ў ПКТ. Яна адмаўлялася ад дапамогі дактароў»
Каментары
Я жадаю ўсім карнікам [Рэд. Выдалена] за ўсе злачынствы што яны здзяйсняюць. Катаванні, збіцці, здзекаванні. Гэтаму няможна дараваць ніколі.
[Зрэдагавана]
Не любяць такіх, што не лёгка не ламаюцца, помсцяць, знішчаюць.