«Я як Аліса — патрапіла ў краіну цудаў». Стваральніца «Вольнага хору» расказала, якія музычныя скарбы знайшла ў Скарынаўскай бібліятэцы ў Лондане
Опера «Усяслаў Чарадзей» Міколы Куліковіча, адзіны зборнік Уладзіміра Тэраўскага «Беларускі лірнік», які захаваўся, пяць «Пагоняў», кружэлкі запісаў 1952 года жаночага хору ў Лювэне пад кіраўніцтвам Міколы Равенскага… І гэта — толькі невялічкая частка таго, што Галіна Казіміроўская прывезла ў Варшаву з Беларускай бібліятэкі імя Францыска Скарыны ў Лондане, піша радыё «Унэт».
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9134-scaled-41k1j.jpg.webp)
У легендарных сховішчах (а гэта самая вялікая ў свеце бібліятэка беларускай эміграцыі) стваральніца «Вольнага хору» працавала 9 дзён. Разбірала архівы Міколы Куліковіча і Гая Пікарда, кожны дзень знаходзячы ў архіўных скрынях каштоўныя скарбы. Цяпер у Галіны Казіміроўскай з’явілася нават не мара — місія: стварыць у музеі музычны аддзел.
У інтэрв’ю радыё «Унэт» Галіна Казіміроўская расказала пра плён свайго лонданскага падарожжа:
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9094-scaled-5vy8a.jpg.webp)
«Я як Аліса — патрапіла ў краіну цудаў. І думаю, што нічога больш значнага ў сваім жыцці я не рабіла. Тое, што са мной адбылося… Я бачу ў гэтым гістарычнае значэнне.
А пасля задавала сабе шмат пытанняў — дзе я была раней? Я ж ведала пра гэты музей яшчэ з кансерваторскіх гадоў. І ніхто нам не перашкаджаў шукаць і вяртаць — ні дыктатура, ні Лукашэнка. Я не хачу думаць, што гэта наша непавага да спадчыны. Хутчэй, няведанне, якое не здымае з нас адказнасці…
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9113-scaled-k8s2t.jpg.webp)
Самая галоўная каштоўнасць — гэта архіў Міколы Куліковіча. Калі творцы не стала, яго жонка, спявачка, перадала ў музейны архіў 9 вялікіх скрыняў. Самае цікавае, што там не толькі ноты, а яшчэ паштоўкі, лісты, афішы, музычная крытыка, аб’яўкі, этнаграфічныя матэрыялы. А побач — рукапісы яго опер, да якіх ты баішся дакрануцца, бо папера настолькі старая, што ўжо рассыпаецца. Амаль кожны дзень у мяне быў амаль перадынфарктны стан — як гэта ўсё захаваць?!»
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9111-scaled-yra81.jpg.webp)
Я выхавалася як харавік і ведала, што ў Куліковіча ёсць опера «Лясное возера». Але пра оперу «Усяслаў Чарадзей» ніколі не чула. І ў архіве ёсць гэтыя ноты! І цяпер, калі я згадваю, як мы ў кансерваторыі дырыжыравалі на экзамене операмі Рымскага-Корсакава… А маглі б вучыцца на творах Куліковіча.
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9099-scaled-gksbv.jpg.webp)
Самыя кранальныя моманты — гэта запісы кружэлак, якія мы алічбоўвалі. У «Пагоню» Равенскага я проста закахалася! А збор запісаў Забэйды-Суміцкага? Наш тэнар з неверагодным голасам, ад якога немагчыма адарвацца.
Большасць песень на гэтых кружэлках — народныя. Хары ў эміграцыі пачыналі менавіта з народнай песні, каб захаваць гэтую сувязь з радзімай. І ў Варшаву я вярнулася з думкай, што хачу спяваць гэтыя песні. Хаця яны не зусім пасуюць «Вольнаму хору». У нас трохі іншы кірунак, іншая місія.
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9126-scaled-dyflp.jpg.webp)
У кожнай краіне ёсць зборнікі патрыятычных песень, якія людзі спявалі на некалькі галасоў. Большасць знойдзеных намі нот тычацца якраз гэтага жанру.
Вы б ведалі, з якіх абрыўкаў у 2020 годзе мы рабілі з «Вольным хорам» нашы партытуры! Як шукалі па ўсім свеце беларускія патрыятычныя песні.
А цяпер яны знайшліся ў лонданскім архіве. Гэта тое, што магло стаць рэпертуарам усіх беларускіх хароў. На гэтых песнях мы маглі выхоўваць сваіх дзяцей.
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9141-scaled-tuk2n.jpg.webp)
Вельмі патрэбная дапамога прафесійных бібліятэкараў, архіварыусаў, даследчыкаў, гукарэжысёраў. Мы адпрацавалі далёка не ўсё. Там ёсць бабіны з запісамі, да якіх мы нават не дабраліся. Ёсць дыяфільмы, на якіх сфатаграфаваныя цэлыя кніжкі. Трэба ўсё алічбаваць, стварыць каталог.
І такія рэчы не робяцца саматужным, аматарскім спосабам. У нармальнай сітуацыі гэта была б справа дзяржаўнага ўзроўню. Але я зраблю ўсё магчымае, каб пры Музеі-бібліятэцы імя Францыска Скарыны ў Лондане з’явіўся музычны аддзел.
![](http://nnexpictures.fra1.digitaloceanspaces.com/img/w732d4webp1/photos/z_2023_09/mg_9151-scaled-cb345.jpg.webp)
Цяпер я ў кантакце з рознымі дзеячамі мастацтва. Разам мы думаем, як нам збудаваць наступныя крокі. Мне хочацца, каб да гэтых архіваў мелі доступ людзі з усяго свету. Каб з гэтымі дакументамі маглі працаваць даследчыкі, навукоўцы, якія б пісалі артыкулы, кнігі, дысертацыі, рабілі зборы твораў. Але для гэтага нам трэба яшчэ вельмі шмат папрацаваць».
Каментары