Разведкі ЗША і Еўропы не знайшлі дачынення Расіі да пашкоджанняў кабеляў у Балтыйскім моры

Пакуль, па словах афіцыйных асоб, расследаванні, праведзеныя з удзелам Злучаных Штатаў і паўтузіна еўрапейскіх службаў бяспекі, не выявілі ніякіх прыкмет таго, што камерцыйныя судны, падазраваныя ў працягванні якароў па марскім дне, рабілі гэта наўмысна або па ўказанні Масквы, піша The Washington Post.

Найхутчэй гэта няшчасныя выпадкі, выкліканыя неспрактыкаванымі экіпажамі на борце судоў, якія знаходзяцца ў дрэнным тэхнічным стане.

За апошнія паўтара года ў Балтыйскім моры адбылося некалькі выпадкаў пераразання падводных кабеляў.

Нягледзячы на першапачатковыя падазрэнні ў дачыненні да Расіі, адзін еўрапейскі чыноўнік заявіў, што ёсць «сустрэчныя доказы», якія сведчаць пра адваротнае. Афіцыйныя асобы ЗША і Еўропы адмовіліся ўдавацца ў падрабязнасці і гаварылі на ўмовах ананімнасці, спаслаўшыся на далікатнасць расследаванняў.

Расследаванне засяроджана на трох інцыдэнтах, падчас якіх судны, якія рухаліся ў расійскія парты або з іх, падазраваліся ў парушэнні ключавых сувязяў у шырокай падводнай сетцы каналаў, па якіх газ, электрычнасць і інтэрнэт-трафік дастаўляюцца мільёнам людзей па ўсёй Паўночнай Еўропе.

Пека Товеры, які прадстаўляе Фінляндыю ў Еўрапейскім парламенце і раней займаў пасаду высокапастаўленага супрацоўніка вайсковай выведкі краіны, заявіў, што выпадкі на марскім дне з'яўляюцца часткай «тыповай гібрыднай аперацыі» Масквы.

«Самае важнае ў любой гібрыднай аперацыі — гэта магчымасць адмаўляць сваю віну», — сказаў Товеры. Расійскім службам бяспекі, магчыма, і ўдалося не пакінуць «ніякіх доказаў, якія можна было б выкарыстоўваць у судзе», сказаў ён, але зрабіць выснову аб тым, што гэта былі няшчасныя выпадкі, «цалкам бессэнсоўна».

Товеры і іншыя спасылаліся на анамаліі ў паводзінах задзейнічаных судоў, а таксама на доказы таго, што Расія на працягу дзесяцігоддзяў укладалася ў складанне карт інфраструктуры заходняга марскога дна і выяўлення там уразлівых месцаў.

Прадстаўнікі еўрапейскіх службаў бяспекі заявілі, што галоўная выведвальная служба Фінляндыі згодная з заходнімі калегамі ў тым, што інцыдэнт з танкерам Eagle S, відавочна, быў няшчасным выпадкам, хоць і папярэдзілі, што выключаць ролю Расіі немагчыма.

Прэс-сакратар Нацыянальнага бюро расследаванняў Фінляндыі, якое вядзе расследаванне інцыдэнту з танкерам Eagle S (адным з судоў, што падкодзіла кабель), заявіла, што расследаванне бюро «ўсё яшчэ адкрыта, і пакуль занадта рана рабіць канчатковыя высновы аб прычынах або камбінацыях, якія стаяць за шкодай».

• 0
• 0
• 4
• 9
• 0
• 0
• 1
• 0