Як паведамляюць Паветраныя сілы Украіны, усяго былі зафіксаваныя пускі 43 крылатых ракет Х-101/Х-555/Х-55 з 10 самалётаў стратэгічнай авіяцыі Ту-95МС з раёна Энгельса.
Ракеты запускалі хвалямі. У паветраную прастору Украіны яны ўваходзілі з розных напрамкаў, мяняючы курс на маршруце.
У выніку Паветраным сілам і сродкам СПА Сіл абароны Украіны ўдалося збіць 36 ракет.
Акрамя крылатых ракет, прыкладна а шостай раніцы па Харкаве ўдарылі зенітнымі кіраванымі ракетамі С-300.
Пад раніцу чацвярга ў Кіеве, Чаркаскай і Хмяльніцкай абласцях, у Харкаве, у Роўне і на Львоўшчыне працавалі сілы супрацьпаветранай абароны, гучалі выбухі.
У Чаркасах у выніку ракетнага ўдару разбураны будынак гасцініцы. Загарэліся гандлёвыя павільёны на рынку. Пацярпелі 7 чалавек і 10 чалавек эвакуяваныя. З-пад завалаў выратаваны 1 чалавек.
У Кіеве ў выніку падзення абломкаў ёсць пашкоджанні ў Дарніцкім, Саломенскім, Шаўчэнкаўскім раёнах. У Дарніцкім раёне ўзніклі ўзгаранні. Ёсць пацярпелыя: 7 чалавек, у тым ліку дзіця.
У Кіеўскай вобласці ў выніку падзення абломкаў узніклі пажары на тэрыторыі прадпрыемстваў. Таксама ёсць пашкоджанні прыватнага сектара. Два чалавекі параненыя.
У Харкаве разбураны складскі будынак. Пацярпелі 2 чалавекі.
У Херсоне расіяне сярод ночы наносілі ўдары па жылых кварталах з рознага тыпу ўзбраення. У выніку ў горадзе ўзнікла 7 пажараў. Гарэлі жылыя і шматкватэрныя дамы, аўтамабілі і гандлёвы рад на адным з рынкаў горада. Паводле звестак паліцыі, 3 чалавекі загінулі, яшчэ 5 параненыя.
Ёсць таксама траплянні і пашкоджанні ў Ровенскай вобласці. Частка Ровенскага раёна без электраэнергіі.
У Львоўскай вобласці расіяне нанеслі ўдар па прамысловай зоне, ёсць разбурэнні і ўзгаранні.
Каментары