Беларусы расказваюць, як польскія консульствы адмаўляюць ім у візах

«Ходзяць чуткі, што хутка турыстычныя візы прыкрыюць»

З 4 верасня беларусы зноў могуць запісвацца на польскую турыстычную візу. Польшча прыпыніла выдачу гэтага тыпу віз для беларусаў з пачатку пандэміі ў 2020 годзе. У дакавідныя часы ў палякаў лёгка можна было атрымаць турыстычную візу на 3-5 гадоў. Пасля аднаго разавага польскага турыстычнага «шэнгена» ў пашпарце наступная віза была на год, потым на тры, і пасля можна было атрымаць пяцігадовую візу. Таму навіна аб вяртанні турыстычных віз выклікала вялікую цікавасць.

Анастасія з Пінска збіралася прыехаць на пару дзён у Познань па турыстычнай візе. У сярэдзіне верасня падалася на візу, перад гэтым забраніравала хостэл. Але 28 верасня дзяўчыне прыйшла адмова: праз «неадпаведнасць заяўленай мэце».

— Усім, хто падаваўся да 20 верасня на турызм, — адмовы. 90% [заявак] — адмовы незалежна ад візавай гісторыі і даходу. Пасля 20 верасня [амбасады] сталі патрабаваць маршрутныя лісты, квіткі на мерапрыемствы, — распавядае Анастасія са сваіх назіранняў па тэматычных чатах, дзе дапамагаюць з лоўляй дат на падачу або складаннем апеляцыі на адмову.

Вікторыя планавала з'ездзіць на адпачынак у польскія Татры. Забраніравала гатэлі: на 4 дні ў Варшаве, 7 дзён у Кракаве і 9 дзён у Закапанэ. Да заявы на візу прыклала банкаўскую выпіску за 3 месяцы і рэшту на рахунку — 1000$, пасведчанне аб рэгістрацыі ІП і дэкларацыю за 6 месяцаў. Беларусцы прыйшла адмова праз «адсутнасць пацверджання мэты знаходжання».

У адным са сталічных візавых агенцтваў «Медыязоне» пацвердзілі, што тэндэнцыя адмоваў па турвізах для беларусаў ёсць:

— 4 верасня, як адкрыліся слоты на турыстычную візу, адразу пайшлі адмовы. Адмоваў вельмі шмат. А калі каму і ўхваляюць, то на разавую паездку. Такой халявы, як была ў 2019 годзе, ужо не будзе. Даходзяць чуткі, што хутка турыстычныя візы прыкрыюць.

Падобная гісторыя была ў Андрэя з Гродна: ён падаў дакументы на турыстычную візу ў гродзенскі візавы цэнтр. З пацверджанняў паездкі ў беларуса былі квіткі да Варшавы і назад, забраніраваны гатэль на 5 дзён. У канцы верасня яму прыйшла адмова праз «неадпаведнасць заяўленай мэце».

«Адмовы былі і да скандалу ў Польшчы»

7 верасня стала вядома, што ў польскім МЗС праходзіць праверка праз занадта вялікую колькасць выдадзеных замежнікам віз. Польскія СМІ пісалі пра карупцыйныя схемы, звязаныя з выдачай польскіх віз замежнікам з краін Афрыкі і Блізкага Усходу. Тады польскія дэпутаты заявілі, што з парушэннем правілаў за тры гады маглі выдаць 350 тысяч віз. Фірмы-пасярэднікі дапамагалі абыходзіць візавыя праверкі, кошт такой «гарантыі» — 4-5 тысяч даляраў. МЗС Польшчы збіраецца разарваць кантракты з фірмамі, якія дапамагаюць з візамі і былі замяшаныя ў карупцыйнай схеме, але пакуль невядома, ці закране рашэнне VFS Global у Беларусі.

Беларускія візавыя агенцтвы распавялі «Медыязоне», што гэты канфлікт паўплываў на выдачу не толькі турыстычных віз. Напрыклад, Вікторыя з Гродзенскай вобласці вучылася ў польскай ВНУ, але пасля першага семестра забрала дакументы і паступіла ў іншую польскую ВНУ.

Беларуска падалася на студэнцкую візу, прыклала даведку пра паступленне, банкаўскую выпіску і астатнія дакументы, якія патрабуе візавы цэнтр. Аднак ёй у канцы верасня прыйшла адмова аб выдачы візы праз «сумневы ў дакладнасці заяўленай мэты знаходжання».

— Адмовы былі і да скандалу ў Польшчы. Але цяпер адмовы ставяць, нягледзячы на аплачаныя броні гасцініц. Па дзелавых мэтах і раней былі адмовы, не такі вялікі працэнт, але былі. Па іншых мэтах — рэдкасць, — распавялі «Медыязоне» яшчэ ў візавым агенцтве.

Падобная сітуацыя са студэнцкай візай была ў Віталіі. Дзяўчына падавалася ў Баранавічах і атрымала адмову праз «непацверджанне мэты знаходжання». Характэрна, што ў беларускі да гэтага ўжо былі дзве гадавыя студэнцкія візы.

Адмову па PBH-візе атрымала сям'я Станіслава з Мінска — ён атрымаў такую візу ў лістападзе, але пераезд сям'і ў Польшчу зацягнуўся і блізкія падаліся на візу ў канцы ліпеня ў брэсцкае консульства.

— У пачатку жніўня атрымалі адмову па пункце «не абгрунтаваная мэта або ўмовы знаходжання» за подпісам міністра. Мяркуючы па ўсім, консул перанакіроўвае паперы ў Варшаву ў выпадку сумневаў. Усе, з кім я меў зносіны (у тым ліку «памочнікі на запіс»), пра адмовы ў такіх кейсах не чулі.

Станіслаў падаў апеляцыю ў консульства на перагляд рашэння і справу выйграў. Консул ухваліў візы для сям'і мінчука.

«Дафіга беларусаў ездзіць»

Адмовы па турыстычных візах прыходзяць не толькі ад польскага консульства. Мінчук Павел нядаўна праз турфірму хацеў зрабіць сабе візу ў Грэцыю. Турфірма займалася браніраваннем месцаў у гатэлі, аплатай пераезду і пералёту. У канцы верасня прыйшла адмова: «абгрунтаванне мэты і ўмоў знаходжання не былі пададзеныя» і «інфармацыя пра мэту і ўмовы знаходжання не надзейная».

— Але ў турфірме папярэджвалі, што без месца працы афіцыйнага або ІП могуць не даць. І на падачы докаў пыталіся гэта ж, — кажа Павел.

Ганна з Мінска распавяла, што адмову атрымала ўся група — кампанія планавала паехаць на экскурсію ў Парыж у кастрычніку. Дакументы афармляла турфірма. У канцы беларусам паведамілі, што паездкі не будзе — консульства Францыі не прыняло дакументы на візы.

— Турагенцтва сказала, што ім у амбасадзе нібыта сказалі, што дафіга беларусаў ездзіць. Я не ведаю, што за адмазка такая дзіўная. Нам прапанавалі перазапісацца на студзень, — распавяла Ганна.

— Мы не бачым усёй карціны па ўсіх агенцтвах і асабістых падачах заяўнікаў. Адмовы заўсёды былі, і за апошнія паўтара месяца, па нашай суб'ектыўнай ацэнцы, пачасціліся па Польшчы, — пракаментавалі «Медыазоне» сітуацыю яшчэ ў адным буйным візавым агенцтве.

• 26
• 8
• 11
• 34
• 26