Майстрыхі з Полацка стварылі ўнікальную кнігу. На кожнай старонцы — шэдэўр
У Віцебску прайшла прэзентацыя незвычайнай кнігі. Яна зроблена рукамі майстроў лапікавага шыцця і прысвечана 85-годдзю Віцебскай вобласці. Галоўную ролю ў стварэнні гэтага шэдэўра адыгралі ўдзельнікі клуба «Рошва», які ўжо амаль дваццаць гадоў працуе ў Полацкім цэнтры рамёстваў і нацыянальных культур, піша выданне Gorod214.by.
Кніга называецца «Віцебшчына: гісторыя, культура, спадчына». У ёй 20 старонак, кожная памерам 50 на 70 см. На старонках размешчаныя маркі, выкананыя ў тэхніцы лапікавага шыцця. Сюжэты адлюстроўваюць важныя вехі гісторыі, прыродныя асаблівасці, культурныя традыцыі Віцебскай вобласці.
Адкрывае альбом герб самага старажытнага горада Беларусі — Полацка. Ёсць маркі з выявамі Спаса-Еўфрасіннеўскага манастыра, князя Рагвалода, князёўны Рагнеды. Ствараючы кнігу, полацкія лапніцы адчулі сябе прадаўжальніцамі традыцый знакамітага земляка-першадрукара і асветніка Францыска Скарыны.
У працы над праектам прынялі ўдзел майстры з 18 раёнаў Віцебскай. вобласці. Вырабленыя маркі яны перадавалі ў Полацк, дзе ўдзельніцы клуба «Рошва» выконвалі ручную сцяжку, зборку і афармленне альбома.
«Мы працавалі 5 месяцаў без перапынку, — расказала кіраўніца і натхняльніца ўнікальнага праекта Ніна Ярмух. — Прыдумаць дызайн кожнай старонкі, напісаць дробныя літары, зрабіць зубцы на марках і шматслойную вокладку — усё гэта было няпроста.
Закупленыя матэрыялы не заўсёды падыходзілі па якасці, а з іх трэба было стварыць шэдэўральныя мініяцюры. Але нашы майстры валодаюць абсалютна ўсімі тэхнікамі, працуюць з любымі тканінамі, маюць аўтарскія ноу-хау. Таму ўсё атрымалася, і мы радыя, што вынік нашай працы падабаецца людзям».
Кіраўніца інтэрнэт-праектаў АНТ распавяла, чаму раптоўна звольнілася ў 2022 годзе і як з'ехала ў Аўстралію26
Каментары