Расійскі блогер паўдзельнічаў у таргах за ўчастак ва ўрадавым пасёлку на Рублёўцы. Аказалася, прадавалі куратнік
«Калі па тэлеку гавораць пра павышэнне кошту яек, яны нават уявіць не могуць, у колькі грошай некаторым абыходзяцца хатнія яйкі».
Расійскі фінансавы блогер Міхаіл Жухавіцкі распавёў у фэйсбуку пра ўдзел у нядаўніх таргах за невялікі ўчастак зямлі (15 сотак), размешчаны ў адным з самых закрытых і элітных пасёлкаў Расіі.
«Ёсць месца, дзе жывуць першыя асобы краіны — пасёлак Пятрова-Дальняе (тэрытарыяльна ў межах Рублёўцы. — «НН»). Там каля 30 дамоў, 10 з якіх знаходзяцца ва ўласнасці адміністрацыі прэзідэнта, а астатнія належаць топ-чыноўнікам.
Нечакана на дзяржаўных таргах па прыватызацыі выйшаў маленькі ўчастак у 15 сотак, але пры гэтым выцягнуты і крывы, бо мае толькі 10 метраў шырыні. Пры гэтым на папярэдні агляд участка нікога не пускалі, бо пасёлак закрыты і ачэплены двума кардонамі аховы, у тым ліку ФСА», — падзяліўся Жухавіцкі.
Па яго словах, кошт участка пачынаўся з 15 мільёнаў расійскіх рублёў (каля $170 тысяч), і на ім забаранялася будаваць дом. Старонку з лотам да таргоў бачыла толькі 200 чалавек, што, на думку Жухавіцкага, з'яўляецца смешнай і мізэрнай колькасцю.
Непакоіла блогера і яшчэ адна дэталь.
«Адзінае, што мяне турбавала — гэта наяўнасць на ўчастку куратніка адной з першых асоб краіны. Па суседстве з ім жыве яшчэ адзін вельмі ўплывовы чалавек, які прымае стратэгічныя рашэнні. А другі сусед — сціплы пенсіянер, у мінулым уладальнік залатога батона ў катэджы пад Кіевам», — напісаў Жухавіцкі.
Далей, як апісаў блогер, ён унёс заклад і пачаліся таргі.
Жухавіцкі хутка вылецеў, бо яго максімальная стаўка за ўвесь перыяд таргоў складала 19,5 мільёна расійскіх рублёў. А вось яго канкурэнты давялі кошт да 240 мільёнаў — $2,67 мільёна!
«Эпілог: 240 мільёнаў з капейкамі за пусты і крывы ўчастак з куратнікам, на якім немагчыма пабудаваць дом, бо забарона. Ці захаваецца там куратнік, альбо цяпер там будуць паўліны — я не ведаю.
Калі па тэлеку гавораць пра павышэнне кошту яек, яны нават уявіць не могуць, у колькі грошай некаторым абыходзяцца хатнія яйкі. А яшчэ гэтыя таргі паказваюць, дзе тваё месца ў іерархіі», — падагульніў блогер.
Пуціну пабудавалі яшчэ і сакрэтную сетку чыгунак і станцый — яны вядуць да яго рэзідэнцый
Вікторыя Азаранка здае дом у Драздах. Як вам інтэр'еры? ФОТЫ
Кіраўніца перадвыбарнага штаба Ціханоўскай набыла «Тэслу». У твітары пакупку ацанілі не ўсе
Дзясяткі беларускіх топ-бізнэсменаў прагарэлі на дзяржаўных аблігацыях. Вярнуць грошы змог толькі сябар Пуціна
Цяпер чытаюць
«Запускайце далей салюты, а я выклічу міліцыю». Беларусы спрачаюцца пра забарону на феерверкі2
Каментары