«Пабачымся ў жніўні». Выйшаў раман Габрыэля Гарсія Маркеса, які раней не выдаваўся
Нобелеўскі лаўрэат з Калумбіі працаваў над раманам «Пабачымся ў жніўні» ў апошнія гады жыцця і не змог давесці раман да канца. Але праз 10 гадоў пасля смерці пісьменніка ягоныя сыны, Радрыга і Гансала Гарсія Барча, вырашылі ўсё ж апублікаваць апошнюю працу бацькі.
«Пабачымся ў жніўні» расказвае гісторыю саракашасцігадовай Анны Магдалены Бах, якая кожны год у адзін і той жа самы летні дзень прыязджае на невялікі востраў у Карыбскім моры ўшанаваць памяць пахаванай тут маці. І кожны год роўна на адну гэтую ноч Анна Магдалена Бах, дабрапрыстойная жонка свайго мужа, заводзіць на востраве новага палюбоўніка.
Сам Гарсія Маркес заяўляў, будучы цяжка хворым, што чарнавік рамана трэба знішчыць, бо кніга «нічога не вартая» — пра гэта чытач даведваецца з сумленнай прадмовы, напісанай сынамі пісьменніка. З гэтай аўтарэцэнзіяй спрачаюцца і яны самі, і рэдактар рамана, і літаратурныя крытыкі.
На іх думку, гэта невялікая, але суцэльная гісторыя. Маркес напісаў пра каханне ў немаладым узросце, пра заўсёды няпростыя адносіны дзяцей ды бацькоў і пра смерць.
Праца над раманам ішла з канца дзевяностых гадоў і да смерці аўтара ў 2014-м. Маркес адчуваў складанасці з кампазіцыяй тэксту з-за слабой памяці, аднак і стыль, і фактура ягонага тэксту пазнавальныя. У рамане знаходзіцца месца і метафарам, і гульням з цыклічным часам.
«Перасталі быць качэўнікамі і аселі на зямлі». Выдавец Янушкевіч прэзентаваў новую кнігарню і расказаў пра перспектывы бізнэсу
«Дрэвы аказаліся больш трывалымі за дамы». Беларуская перакладчыца прайшлася па ўругвайскай сталіцы сцежкамі старых успамінаў
Вогненныя цытаты з кнігі Маркеса «Каханне падчас халеры» па-беларуску
Каментары