Скрыншот відэа ў інстаграме lolly_ly

Скрыншот відэа ў інстаграме lolly_ly

Пасля таго, як вельмі эмацыйнае відэа завірусілася, на сітуацыю звярнулі ўвагу чыноўнікі. Сустрэцца з сям'ёй Сухарукавых паспяшаўся асабіста міністр аховы здароўя Аляксандр Хаджаеў. Прэс-служба выпусціла заяву пра тое, што міністр прынёс спачуванні пары і паабяцаў, што «якасць аказання медыцынскай дапамогі супрацоўнікаў радзільнага дома, а таксама працу Камітэта па ахове здароўя Мінгарвыканкама ацэніць лячэбна-кантрольны савет пры Міністэрстве аховы здароўя».

Чыноўнікі не сталі паведамляць, чым скончылася праверка. Кацярына Сухарукава таксама больш не распавядала нічога ў сваіх сацсетках. Але нядаўна ў каментарах нехта спытаўся, ці пакаралі вінаватых у смерці немаўляці.

Жанчына адказала: «Так. Яны атрымалі вымову». Яна ўдакладніла, што для супрацоўнікаў радзільні ўсё і скончылася звычайнай вымовай.

Нагадаем некаторыя падрабязнасці той жахлівай гісторыі. Для 31-гадовай Кацярыны Сухарукавай гэта была першая цяжарнасць, яна працякала без ускладненняў. Роды не пачаліся самі, таму жанчына прыехала ў радзільню ў дзень, які быў прызначаны ёй для планавай шпіталізацыі — 15 студзеня. Тэрмін цяжарнасці складаў 41 тыдзень і 1 дзень, плод быў даволі вялікім — больш за 4 кілаграмы. Аднак парадзісе сказалі, што паказанняў для кесаравага сячэння няма.

У аперацыі адмовілі нават пасля таго, як пабачылі зялёныя воды пасля некалькіх гадзін стымуляваных схватак. У выніку выцягваць дзіця прыйшлося вакуумам. Немаўля не заплакала. Яго пачалі рэанімаваць, але цуду не адбылося — праз некалькі гадзін у дзяўчынкі спынілася сэрца. Прычынай смерці немаўляці пазначалася цяжкая асфіксія — кажучы простай мовай, дзяўчынка доўга была без кіслароду.

Раней супрацоўніца аднаго з беларускіх радзільных дамоў расказала «Нашай Ніве», што насамрэч такія выпадкі, на жаль, не адзінкавыя. А прычына трагедый гучыць цынічна і жудасна — дактары не хочуць сапсаваць статыстыку па колькасці кесаравых.

Міністэрства аховы здароўя Беларусі патрабуе праводзіць кесарава не больш чым у 30% выпадкаў (а лепей, каб гэты працэнт ва ўстанове аховы здароўя быў яшчэ ніжэйшы) — гэта ўстаноўка на ўзроўні начмедаў, галоўных дактароў. Суразмоўца падкрэслівала: калі працэнт значна перавышае «норму», тады дастаецца ўсім у радзільні.

У дзяржаўных СМІ звяртаюць увагу, што ў Еўропе частата кесаравых сячэнняў даходзіць да 50%, у Лацінскай Амерыцы нават да 60%, затое ў Беларусі — каля 31%.

Чытайце таксама:

«Малышка паспела толькі расплюшчыць вочкі». У Мінску немаўля памерла ад асфіксіі — медыкі не сталі рабіць кесаравага 

У Салігорску ў часе родаў пацярпела немаўля. Маці запісала ў тыктоку скаргу да Лукашэнкі — у радзільню адправілі камісію 

«На жаль, такіх жудасных гісторый хапае». Супрацоўніца радзільні пра выпадак з парадзіхай у Салігорску

Клас
2
Панылы сорам
17
Ха-ха
0
Ого
4
Сумна
24
Абуральна
50