У час удару па ўкраінскім памежным пераходзе там былі еўрапейскія дарадцы па бяспецы і Борыс Джонсан
Расійская армія нанесла серыю ўдараў па лагістычнай інфраструктуры на ўкраінска-польскай мяжы, ледзь не закрануўшы спеццягнік з высокапастаўленымі палітыкамі. Начная атака прымусіла польскія ўлады падняць у паветра знішчальнікі і правесці экстраную эвакуацыю заходніх чыноўнікаў прама на чыгуначных пуцях.
Выданне Der Spiegel паведамляе пра мэтанакіраваны напад на стратэгічны памежны пераход Ягадзін — Дарагуск.
Інцыдэнт адбыўся каля пятай гадзіны раніцы ў момант, калі непадалёк спыніўся прыватны чартарны цягнік з удзельнікамі міжнароднай канферэнцыі па бяспецы YES. Сярод эвакуяваных праз пагрозу ўдараў пасажыраў аказаліся дарадца канцлера Германіі па знешняй і бяспекавай палітыцы Гюнтэр Заўтэр, былы прэм'ер-міністр Вялікабрытаніі Борыс Джонсан, а таксама дарадцы па бяспецы з Францыі і Італіі.
Дроны ўдарылі па лакаматыве рэйсавага пасажырскага цягніка Кіеў — Варшава ўсяго за два кіламетры ад мяжы з Польшчай. Абышлося без ахвяр дзякуючы таму, што маніторынгавая група загадзя папярэдзіла брыгаду аб пагрозе. Адначасова беспілотнікі атакавалі інфраструктуру самога прапускнога пункта, дзе загарэліся грузавікі і была пашкоджана аўтазаправачная станцыя.
Напад выклікаў экстранную рэакцыю Варшавы. У польскім прымежжы спрацавалі сірэны паветранай трывогі, а ваенна-паветраныя сілы краіны паднялі баявую авіяцыю для перахопу беспілотнікаў у выпадку іх пранікнення ў паветраную прастору Польшчы. Дэпутат нямецкага бундэстага Робін Вагенер, які таксама знаходзіўся ў эвакуяваным спеццягніку, назваў інцыдэнт правакацыяй супраць саюзнікаў Украіны і запатрабаваў пакласці канец падобнаму тэрору на межах Паўночнаатлантычнага альянсу.
Міністр замежных спраў Украіны Андрэй Сібіга ахарактарызаваў начныя падзеі як прамы выклік Захаду. Паводле яго слоў, пуцінскі тэрор стукаецца непасрэдна ў дзверы ЕС і НАТА, а расійскія варвары стаяць перад брамай Еўропы.
З лета гэтага года расійскае камандаванне змяніла тактыку, пачаўшы сістэматычна знішчаць памежную інфраструктуру на захадзе Украіны. Мэтай гэтай кампаніі з'яўляецца блакіроўка экспарту і разбурэнне лагістычных маршрутаў паставак дапамогі ад еўрапейскіх краін. Агулам у ноч на 13 верасня расійская армія выкарыстала для ўдараў па ўкраінскай тэрыторыі 453 беспілотнікі розных тыпаў, што прывяло да пераводу ўсяго персаналу ўкраінскай чыгункі ў стан найвышэйшай гатоўнасці.
Цяпер чытаюць
Той самы масажыст расказаў, навошта здымаў голых кліентак22
Каментары