Айцішнік паехаў з Лодзі на святы ў Беларусь і трапіў за краты. Што пра яго вядома
Уладзіслаў Марчык паспяхова працаваў fullstack-распрацоўшчыкам, жыў у польскай Лодзі. У канцы 2025 года ён вырашыў наведаць радзіму і прапаў. Як выявілася, 27‑гадовага талента асудзілі па двух крымінальных артыкулах — за «абразу Лукашэнкі» і «распальванне варожасці».
Уладзіславу Марчыку 27 гадоў. У 2020 годзе скончыў Беларускі дзяржаўны ўніверсітэт інфарматыкі і радыёэлектронікі (БДУІР).
Марчык — праграміст, быў fullstack-распрацоўшчыкам, пісаў на C# і Angular, працаваў з платформай.NET. Апошнімі гадамі айцішнік жыў у Польшчы, у Лодзі.
Уладзіслаў цікавіўся відэагульнямі (Dota 2, Sekiro, The Witcher) і гісторыяй.
У канцы 2025 года Уладзіслаў паехаў на радзіму. Імаверна, менавіта падчас гэтай паездкі на навагоднія святы або неўзабаве пасля яе айцішнік быў арыштаваны.
Нядаўна над Уладзіславам адбыўся суд. 4 верасня 2026 года набыў законную моц прысуд Мінскага гарадскога суда. Марчыка прызналі вінаватым паводле ч. 1 арт. 130 (распальванне іншай сацыяльнай варожасці) і ч. 1 арт. 368 (абраза Лукашэнкі) Крымінальнага кодэкса.
Падрабязнасці справы невядомыя. Хлопцу прысудзілі хімію з накіраваннем.
Праваабаронцы не раз папярэджвалі, што сілавікі цікуюць за беларусамі, якія вяртаюцца з-за мяжы. Людзей правяраюць і кідаюць за краты за старыя каментары, дапамогу рэпрэсаваным або ахвяраванні, шыючы ім крымінальныя справы за «распальванне варожасці» ці «садзейнічанне экстрэмісцкай дзейнасці».
Масавыя палітычныя рэпрэсіі ў краіне пачаліся пасля 2020 года. Тады Аляксандр Лукашэнка прайграў Святлане Ціханоўскай, але не аддаў ёй улады, а змусіў яе выехаць за мяжу. Адбыліся масавыя народныя пратэсты супраць дыктатуры і фальсіфікацыі выбараў. На гэта ўлады адказалі рэпрэсіямі.
Паводле падлікаў аб'яднання сілавікоў «Белпол» і праваабаронцаў, вядомыя імёны як мінімум 10050 чалавек, якія падпалі пад палітычна матываваныя крымінальныя справы. Усяго тыя ці іншыя палітычныя рэпрэсіі (крыміналкі, адміністратыўкі, звальненні, ператрусы, вымушаная эміграцыя) закранулі сотні тысяч беларусаў.
«Экстрэмізмам» улады Беларусі лічаць патрабаванне правесці свабодныя выбары з празрыстым падлікам галасоў, а таксама практычна ўсялякую крытыку ўладаў, прарасійскіх гістарычных наратываў, праявы салідарнасці з Украінай, антываенныя выступы.
«Наша Нiва» — бастыён беларушчыны
ПАДТРЫМАЦЬМаркетолаг прагнозу надвор'я WindyApp прыехаў на радзіму — і яго пасадзілі на пяць гадоў за крыптаданаты Украіне
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»
25‑гадовага каардынатара IT-праектаў па вяртанні з Польшчы асудзілі за «садзейнічанне экстрэмізму»
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары