«На жаль, такіх жудасных гісторый хапае». Супрацоўніца радзільні пра выпадак з парадзіхай у Салігорску
У Салігорску з-за таго, што жанчыне своечасова не зрабілі кесарава, немаўля трапіла ў рэанімацыю ў цяжкім стане. Цяпер яна просіць дапамогі ў Лукашэнкі, а Мінздароўя накіравала спецыяльную камісію ў Салігорскую цэнтральную раённую бальніцу. Супрацоўніца аднаго з беларускіх радзільных дамоў распавяла «Нашай Ніве», што такія выпадкі, на жаль, не адзінкавыя.
«Я не магу сказаць, што ў мяне вялікі досвед працы, але ж я магу прыгадаць як мінімум 10 аналагічных сітуацый, калі жанчына шмат гадзін нараджала, ёй не зрабілі своечасова кесарава, а ў выніку ў дзіцяці жудасная асфіксія, — кажа доктарка. — Я бачыла гэтых дзяцей, якім па шкале Апгар ставяць 1 (шкала ацэнкі стану нованароджанага, дзе максімальны бал 10. — НН). Іх спрабуюць рэанімаваць, а там сэрца ледзь стукае. У маёй практыцы нават былі выпадкі, калі жанчына нараджала мёртвае дзіця — і адбылося гэта толькі з-за таго, што акушэр-гінеколаг прагледзеў пункт незвароту і дачакаўся таго моманту, калі кесарава ўжо нельга рабіць.
Добра, канешне, што жанчына ў Салігорску не пабаялася гучна распавесці пра свой выпадак — ёсць хаця б невялікі шанец, што Мінздароўя нешта зробіць. Бо звычайна дактары ўпрошваюць бацькоў не падымаць скандал. Абяцаюць, што з часам дзіця паправіцца: «Гэта ж дзеці, не хвалюйцеся». Вельмі верагодна, што дзіця будзе мець цяжкую ступень інваліднасці. Але калі лекары кажуць, што ўсё будзе добра, бацькам хочацца спадзявацца на цуд».
Суразмоўца кажа, што прычына такіх жудасных гісторый адна — патрабаванне Міністэрства аховы здароўя праводзіць кесарава не больш чым у 30% выпадкаў (а лепей, каб гэты працэнт ва ўстанове аховы здароўя быў яшчэ ніжэйшы) — гэта ўстаноўка на ўзроўні начмедаў, галоўных дактароў. Калі працэнт значна перавышае «норму», тады дастаецца ўсім у радзільні.
У дзяржаўных СМІ звяртаюць увагу, што ў Еўропе частата кесаравых сячэнняў даходзіць да 50%, у Лацінскай Амерыцы нават да 60%, затое ў Беларусі — каля 31%.
«Трэба яшчэ разумець, што ў Беларусі існуе практыка «адно кесарава — заўжды кесарава». То-бок калі жанчыне аднойчы зрабілі кесарава, то ўсе астатнія роды ў яе хутчэй за ўсё будуць толькі такімі. Дамагчыся, каб табе дазволілі нараджаць самой пасля кесарава, нават калі ты вельмі гэтага хочаш, даволі складана (але магчыма). А гэта значыць, што акушэры-гінеколагі памятаюць і пра тое, што, калі яны зараз зробяць табе кесарава, ты ім і ў наступны раз статыстыку гарантавана сапсуеш».
Доктарка кажа, што не можа знайсці апраўданне такой стратэгіі і яе абурае такая практыка. На пытанне, ці можа парадзіха зрабіць нешта, каб абараніць сябе ў няпростай сітуацыі, адказвае:
«Скандаліць, крычаць: «Я зараз патэлефаную на гарачую лінію Міністэрства аховы здароўя, знаёмым чыноўнікам!» Чым больш увагі вы да сябе прыцягнеце, тым большая імавернасць, што медыцынскі персанал вакол спалохаецца і вырашыць, што лепш пазбегнуць вялікага скандалу, чым не ўпісацца ў статыстыку.
Вядома, шмат што залежыць ад змены — галоўнае, ад лекара, які ацэньвае стан жанчыны. Бывае, што сітуацыя пачынае пагаршацца, а начмед кажа: «Не, мы не будзем кесарыць, няхай нараджае сама!» Праз гадзіну ён ідзе дадому, бо працоўны дзень скончыўся, а іншы доктар прымае рашэнне зрабіць кесарава — і гісторыя заканчваецца добра».
Чытайце таксама:
-
На магіле Вячкі Станкевіча на помніку — ні слова па-беларуску. Вось пра што гэта кажа наконт эмігрантаў, эміграцыі і «беларускасці ўнукаў»
-
Львоўскі: У Беларусі нацыянальнае свята — гэта рыцарскія турніры, у Расіі — сарафаны і карагоды
-
Прарыў мараканцаў у Сеуту: што гэта было? Ці магла гэта быць тонкая помста Вашынгтона Мадрыду? І ці адаб’ецца на легалізацыі беларусаў?
Цяпер чытаюць
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
Каментары