Больш чым $2000 за «квадрат». Дзе знаходзяцца і колькі каштуюць элітныя кватэры ў Гродне
Закрыты двор, тэрасы, від на гістарычны цэнтр… Паглядзелі, як выглядае і па якіх цэнах прадаецца жытло ў элітных дамах Гродна.
Элітны даўгабуд побач з рынкам і вакзалам
Адзін з элітных дамоў у Гродне знаходзіцца ў непасрэднай блізкасці да гістарычнага цэнтра па адрасе вул. Парахавая, 9.
Яго пачалі будаваць у 2006 годзе, але неўзабаве будаўніцтва застопарылася. Дольшчыкі чатыры гады не маглі атрымаць свае кватэры. Заканчваць будаўніцтва давялося мясцовым уладам. Дом быў гатовы толькі ў 2011 годзе.
Паралельна з гэтым, у траўні 2011 года, на дырэктара фірмы СТАА «Кансент», якая будавала дом, завялі крымінальную справу. Праз амаль 2,5 года яго прысудзілі да трох гадоў пазбаўлення волі з канфіскацыяй маёмасці. Усяго па справе праходзіла 200 пацярпелых.
На сёння ў элітным доме прадаецца каля 10 кватэр. Адна з іх — самая дарагая з выстаўленых на продаж у Гродне.
За пентхаус без унутранага аздаблення агульнай плошчай 324 м² просяць 450 тысяч даляраў.
Кватэра ў продажы як мінімум з мінулага лета. Цана за год не змянілася. Таму выглядае, што гаспадар не спяшаецца пазбаўляцца ад яе.
Як і рабіць там рамонт, бо дом здадзены больш за 10 гадоў таму, а ў кватэры дагэтуль голыя сцены.
Гэта, дарэчы, не адзіная кватэра без рамонту, якую тут прадаюць. За чатырохпакаёўку на 155 м² просяць 129 500 даляраў. У аб'яве пазначана, што пры жаданні з адной кватэры можна зрабіць дзве.
Самая танная кватэра ў доме — аднапакаёўка агульнай плошчай 65 м². Просяць за яе 61 тысячу даляраў.
«Аўтэнтычная кватэра ў цэнтры Гродна. Прасторная і ўтульная, з добрым рамонтам і мэбляй. Ёсць камора (у дадзены момант абсталявана пад спальню). Вялікі сумешчаны санвузел», — гаворыцца ў апісанні.
Тым не менш, у сучасных пакупнікоў да элітарнасці дома могуць узнікнуць пытанні. У крокавай дасяжнасці — аўтавакзал і цэнтральны рынак. Абедзве лакацыі ў непасрэднай блізкасці да дома наўрад ці можна назваць плюсам.
Мала паверхаў і закрытая тэрыторыя
Падобна, што з часам гараджане і дывелаперы зразумелі, што па-сапраўднаму элітнае жытло не мусіць быць шматпавярховым. Усё часцей сучасныя дамы, якія пазіцыянуюцца як клас прэміум, маюць толькі 5-7 паверхаў.
Іншы элітны дом у Гродне знаходзіцца па адрасе вул. Свярдлова, 12.
У ім прадаюцца адразу дзве кватэры. Абодва варыянты без аздаблення, але з выхадам на тэрасу.
За аднапакаёвую кватэру плошчай 52 м² просяць 60 тысяч даляраў. З жылога памяшкання ёсць выхад на тэрасу плошчай 35 м².
Другая кватэра без цаны. Яна таксама без рамонту і з велізарнай уласнай тэрасай плошчай 44 «квадраты». Сама кватэра мае плошчу 145 м².
Адразу два элітныя дамы месцяцца на вуліцы Будзёнага. Абодва маюць закрытыя двары і падземны паркінг. На Будзёнага, 28 цяпер кватэр у продажы няма, а вось у доме нумар 30, які толькі нядаўна пабудавалі, прапануюць дзве кватэры без аздаблення.
За аднапакаёўку агульнай плошчай 40 м² просяць $47 900. За двухпакаёўку плошчай 79 м² выставілі цану $97 000. Абедзве кватэры маюць голыя сцены, месцяцца яны на апошнім пятым паверсе. На даху дома ёсць зона адпачынку для жыхароў.
Яшчэ адзін элітны дом у Гродне знаходзіцца на вул. Цітова, 14. Цяпер там у продажы 5 кватэр.
Самыя танныя — аднапакаёўкі без рамонту з агульнай плошчай 43 і 49 м². Просяць за іх 65 000 і 66 500 даляраў адпаведна.
У гэтым жа доме прадаецца двухпакаёўка з дызайнерскім рамонтам, мэбляй і тэхнікай. Просяць за яе 129 900 даляраў. Агульная плошча жытла — 64 м². Гэта каля $2030 за 1м².
Статус элітнага гэтаму дому прыдаюць не толькі закрытая дваровая тэрыторыя, падземны паркінг, зона адпачынку на даху. Тут ёсць спартыўная зала і пральня для жыхароў. На фоне іншых «элітак» гэты дом вылучае яго лакацыя.
Гэты 7-павярховік месціцца ў ціхім месцы. Дом стаіць унутры двара, таму вокны не выходзяць на шумныя вуліцы, а з часткі кватэр адкрываецца від на гістарычны цэнтр горада.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»18
Каментары
Дизайнер, бяры не глядзя