Пачаўся 60-ты Міжнародны Берлінскі кінафэст, які прэзентуе стужкі Скарсэзэ і Паланскага.
Галоўны ўдзельнік гэтага Берлінскага кінафэсту, пэўна, не ступіць на ганаровы чырвоны ходнік. Раман Паланскі пад хатнім арыштам. Нагадаем, яшчэ з 1977 г. яго абвінавачваюць у згвалтаванні.
У новым палітычным трылеры Паланскага «Прывідны аўтар», што зняты паводле кнігі Роберта Гарыса, галоўную ролю сыграў Эван Макгрэгар. Ён — пісьменнік, якога наняў рэдагаваць мемуары экс-прэм'ер Брытаніі (у выкананні Пірса Броснана). У працэсе рэдактуры ўсплываюць змрочныя таямніцы жыцця палітыка. І ў літаратара пачынаюцца праблемы...
Гэта першая паўнаметражная стужка Паланскага за 5 гадоў пасля «Алівера Твіста».
Але не толькі стужка Паланскага будзе цэнтрам увагі ў Берліне: Марцін Скарсэзэ («Банды Нью-Ёрка», «Авіятар») прадставіць свой новы крымінальны трымценнік «Пракляты Востраў» з Леанарда Ды Капрыо ў галоўнай ролі. Прэм'ера адбудзецца па-нямецку за некалькі дзён да сусветнага пракату (у Беларусі трылер пачнуць паказваць ад 18 лютага).
І яшчэ фільм, варты ўвагі: амерыканец Ноа Баўмбах (аўтар сцэнару оскараноснага камэдыйнага «Кальмара і Кіта») прадставіць сваю трагікамедыю «Грынберг» з Бэнам Стылерам («Ноч у музеі»). Яна пра крызіс сярэдняга веку.
Рыхтуючы фестываль, не забыліся немцы і пра справу папулярызацыі сваёй кінакласікі: падчас кінафэста адбудзецца рэтра-паказ стужкі легендарнага Фрыца Ланга «Метропаліс», маці ўсіх фантастычных антыўтопіяў. Гледачам прапануюць адноўлены фільм, з сцэнамі, якія шчасліва знайшліся ў 2008 годзе. А яшчэ ў Берліне, усё роўна як у Лос-Анджэласе, з нагоды фэстывалю будзе ўрачыста адкрытая Алея Зорак, на якой будуць увекавечаныя імёны вядомых дзеячаў кіно.
Кінафэст у Берліне працягнецца 10 дзён, а яго пераможцы будуць абвешчаныя 20 лютага. Ганаровымі гасцямі кінафэсту зробяцца Жэрар Дэпард'ё, Бэн Стылер і Жанна Маро. Перамога Берлінскага кінафэсту — заяўка на «Оскара»: напрыклад леташняя пераможца, перуанская драма «Малако смутку» пазмагаецца праз месяц за «Оскара» у намінацыі «Найлепшы замежны фільм».
Цяпер чытаюць
Польскі дыпламат расказаў, як прывозіў Колю мультфільмы на дысках і кім для сям'і Лукашэнкаў быў Макей8
Каментары