Жыхарам Мядзельшчыны, якія катавалі земляка распаленым прасам, далі немалы тэрмін
Страсці разгарэліся з-за царскай манеты.
2 верасня суд Мядзельскага раёна разгледзеў крымінальную справу да двух жыхароў вёскі Брусы, піша Kraj.by.
Пра абставіны крымінальнай справы распавёў намеснік пракурора Мядзельскага раёна Андрэй Гавета.
— Увечары 15 мая абвінавачаныя выпівалі. Падчас размовы адзін расказаў, што пакуль быў на працы ў Мінску, хтосьці разабраў ягоныя вадзяныя помпы. Яны выказалі здагадку, што да гэтага можа быць датычны іх аднавясковец. Пасля мужчыны ўспомнілі, што ў таго вяскоўца ёсць залатая манета 10 рублёў 1899 года выпуску. Распіваючы спіртное, яны вырашылі забраць манету, каб прадаць за 2000 рублёў.
Абвінавачаныя прыйшлі дадому да пацярпелага. Мужчына ў той вечар быў у стане алкагольнага ап'янення і нават спаў. Нягледзячы на гэта, яго пабудзілі і прад'явілі прэтэнзіі наконт помпаў. Калі мужчына заявіў, што не датычны да крадзяжу, сталі патрабаваць ад яго аддаць залатую манету.
— Першыя двое мужчынаў нанеслі аднавяскоўцу сем удараў рукамі па тулаве і па галаве, а таксама два ўдары драўлянай палкай. Пацярпелы не прызнаваўся, дзе знаходзіцца залатая манета.
Тады яны, выявіўшы ў доме прас, уключылі яго ў разетку. Адзін з мужчын агаліў цела пацярпелага і трымаў. Другі зрабіў не менш за 10 кантактаў паверхняй распаленага праса з тварам і жыватом. Тым не менш пацярпелы так нічога і не паведаміў аднавяскоўцам пра манету, — распавёў Андрэй Гавета.
У выніку мужчына атрымаў тэрмічныя апёкі твару, грудной клеткі і пярэдняй брушной сценкі рознай ступені плошчай 8% ад усёй паверхні цела. Таксама ў пацярпелага была зафіксаваныя гематома слізістай абалонкі ў шчочнай вобласці справа, раны ў паяснічнай вобласці, сінякі на левым плячы, усё гэта пацягнула расстройства здароўя на чатыры месяцы.
У судовым пасяджэнні абодва жыхары Мядзельскага раёна прызналі сваю віну ў поўным аб'ёме.
Суд Мядзельскага раёна прызнаў мужчын вінаватымі ў здзяйсненні злачынства, прадугледжанага часткай другой артыкула 207 Крымінальнага кодэкса Рэспублікі Беларусь, і прызначыў кожнаму з іх пакаранне ў выглядзе пазбаўлення волі на тэрмін 8 гадоў з адбываннем пакарання ў папраўчай калоніі ўзмоцненага рэжыму са штрафам 100 базавых велічынь (4000 рублёў).
Вялікая гутарка з Алінай Коўшык — пра інтэрв’ю з Падсасонным, скандал з Кулеем і рэформы на «Белсаце»13
Каментары