За атаку дрона на базу АМАПа двух вайскоўцаў завочна асудзілі да вялікіх тэрмінаў і штрафаў
У Мінскім гарадскім судзе быў вынесены завочны прысуд добраахвотніку ва Украіне Паўлу Кулажанку і былому вайскоўцу Віталю Пацехіну. Іх абвінавацілі паводле шасці артыкулаў КК, у тым ліку «акце тэрарызму», за атаку дронам на базу АМАПа ў ноч на 25 верасня 2021 года. Суддзя Міхаіл Макарэвіч прызначыў ім 24 і 23 гады калоніі ва ўмовах узмоцненага рэжыму адпаведна, а таксама штраф 1000 базавых велічыняў (40 000 рублёў) кожнаму. Апроч гэтага Пацехіна пазбавілі звання «капітан у адстаўцы», піша «Вясна».
Павел Кулажанка — былы баец АМАПа, які цяпер ваюе як добраахвотнік ва Украіне. Пацехін — былы вайсковец. Менавіта яго назвалі выканаўцам атакі на базу АМАПа. Абодва маюць дачыненне да ініцыятывы «Супраціў», якую прызналі тэрарыстычнай.
Як заяўляе следства, Пацехін «пры садзейнічанні недасведчаных кантрабандыстаў» атрымаў з Украіны дрон вялікай грузападымальнасці і некалькі месяцаў рыхтаваўся да нападу.
«У начны час на тэрыторыі свайго ўчастка ў Мінскім раёне абвінавачаны эксперыментаваў з запальнай сумессю і трэніраваўся кіраваць беспілотнікам. Каб павысіць шанцы на поспех, ён мадэрнізаваў лятальны апарат, усталяваўшы прыстасаванне скідання грузу і відэакамеру. Да дня выканання тэракту Пацехін усё старанна спланаваў і ў ноч з 24 на 25 верасня рэалізаваў задуманае. /…/ З дапамогай беспілотніка абвінавачаны скінуў дзве пяцілітровыя бутэлькі з запальнай сумессю на базу АМАП», — гаварылася ў абвінавачванні СК.
Пасля гэтага ён схаваў дрон і пакінуў Беларусь. Аператыўнікі, аднак, знайшлі пазней беспілотнік.
Кулажанку і Пацехіну выставілі абвінавачанні па васьмі артыкулах Крымінальнага кодэкса: «акт тэрарызму, здзейснены арганізаванай групай» (ч. 3 арт. 289 КК), «стварэнне і кіраванне тэрарыстычнай арганізацыяй» (ч. 1 і ч. 2 арт. 290-4 КК), «змова з мэтай захопу ўлады» (ч. 1 арт. 357 КК), «незаконныя дзеянні ў адносінах да прадметаў, паражальнае дзеянне якіх заснавана на выкарыстанні гаручых рэчываў» (ч. 2 арт. 295-3 КК), «садзейнічанне экстрэмісцкай дзейнасці» (ч. 1 і ч. 2 арт. 361-4 КК), «арганізацыя дзейнасці тэрарыстычнай арганізацыі і ўдзел у дзейнасці такой арганізацыі» (ч. 1 і ч. 2 арт. 290-5 КК).
На маёмасць Кулажанкі і Пацехіна накладзены арышт агульным коштам каля 240 тысяч рублёў.
Каментары