У Расіі судзяць адвакатаў Навальнага. Ім пагражае да шасці гадоў калоніі

Петушынскі раённы суд Уладзімірскай вобласці сёння пачаў разглядаць крымінальную справу супраць адвакатаў загінулага Аляксея Навальнага — Вадзіма Кобзева, Аляксея Ліпцэра і Ігара Сяргуніна.

Паводле версіі следства, яны, «выкарыстоўваючы свой статус», дапамагалі Навальнаму кіраваць «экстрэмісцкай суполкай», калі нібыта перадавалі ягоныя лісты паплечнікам. Абарона настойвае, што складу злачынства няма, а абвінавачванне базуецца на «ўварванні ў адвакацкую таямніцу». Неўзабаве пасля пачатку пасяджэння суддзя закрыла працэс па хадайніцтве абвінавачвання, піша Бі-бі-сі.

Петушынскі раённы суд знаходзіцца каля калоніі ў Пакрове, куды Навальны быў адпраўлены адбываць свой першы тэрмін адразу пасля вяртання ў Расію ў 2021 годзе.

Цяпер Кобзеў (які бараніў Навальнага з 2011 года да свайго арышту), а таксама Сяргунін і Ліпцэр (якія нядоўга ўдзельнічалі ў абароне палітыка, калі ён сядзеў у калоніі ў Пакрове), самі апынуліся на лаве падсудных. Іх абвінавачваюць ва ўдзеле ў экстрэмісцкай супольнасці (частка 2 артыкула 282.1 КК РФ). Па гэтым артыкуле ім пагражае да шасці гадоў пазбаўлення волі.

Па версіі следства, яны «выкарыстоўвалі свой статус» і рэгулярна перадавалі паведамленні Навальнага яго паплечнікам.

Паплечнікі палітыка са спасылкай на матэрыялы крымінальнай справы ў дачыненні да адвакатаў распавядалі, што, паводле версіі следства, абмен паведамленнямі адбываўся шляхам «вуснай перадачы» паміж Навальным і паплечнікамі, а таксама шляхам «атрымання ад іх і перадачы Навальнаму і назад лістоў і іншай карэспандэнцыі, з выкарыстаннем для гэтага розных каналаў сувязі, у тым ліку электронных паштовых сэрвісаў. Тым самым, як мяркуе следства, Навальны «працягнуў ажыццяўляць функцыі лідара і кіраўніка экстрэмісцкай супольнасці», а адвакаты ўвайшлі ў яго склад.

Экстрэмісцкай суполкай улады Расіі лічылі Навальнага і ягоных паплечнікаў. Па гэтай справе Аляксей Навальны ў пачатку жніўня 2023 года быў прысуджаны да 19 гадоў калоніі асаблівага рэжыму.

Сёння пракурор павінен абвясціць абвінаваўчае заключэнне. Абарона настойвала на адсутнасці ў справе складу злачынства і ўварванні ў адвакацкую таямніцу. Меркавалася, што пасяджэнне будзе адкрытым.

Дзяржабвінаваўца сцвярджаў, што атрымаў з Цэнтра «Э» МУС паведамленне аб правакацыях і на гэтым судзе, а таксама побач з ім, так як прыхільнікі Навальнага застаюцца за мяжой, і яны нібыта сістэматычна займаліся правакацыямі.

Абаронцы Кобзева, Ліпцэра і Сяргуніна ў сваіх выступах звярталі ўвагу суда на тое, што дасланы з МУС дакумент не ўтрымлівае спасылак на аператыўныя звесткі і нават прыкладаў магчымых пагроз, што робіць яго больш падобным на набор «нават не высноў, а здагадак».

Нягледзячы на гэта суддзя Шылава назвала ліст «аб'ектыўнымі звесткамі» і абвясціла працэс закрытым.

• 0
• 0
• 0
• 2
• 1
• 0
• 2
• 0