«Катастрофа ў Сірыі набірае абароты». Расійскія ваенкары і эксперты ў шоку ад імклівага падзення гарадоў

З Сірыі працягваюць прыходзіць сумныя для Расіі навіны. Сёння сірыйская армія пакінула горад Хама, які за 13 гадоў канфлікту ні разу не быў пад кантролем паўстанцаў.

Эксперты лічаць, што здача Хамы можа мець цяжкія наступствы, паколькі ставіць пад прамую пагрозу іншы горад — Хомс.

Як піша «Военный осведомитель», у выпадку захопу Хомса паўстанцам адкрыецца дарога не толькі на поўдзень да сталіцы Сірыі Дамаска, але і зручны шлях на захад да ўзбярэжжа, дзе размяшчаюцца ключавыя расійскія вайсковыя аб'екты — база ВМФ у Тартусе, да якой будзе каля 80 кіламетраў, і далей за ім аэрадром Хмеймім у Латакіі.

«Такім чынам, калі джыхадысты ўсталююць кантроль і над Хомсам, то гэта само па сабе не толькі адрэжа ўзбярэжжа і расійскія базы на ім ад сталічнага рэгіёну, але і ўздыме пытанне пра неабходнасць іх эвакуацыі.

А наступнае прасоўванне джыхадыстаў у бок Дамаска паставіць пытанне ўжо пра існаванне саюзнай нам сірыйскай дзяржавы, якой мы яе ведаем апошнія некалькі гадоў», —

заўважае «Военный осведомитель» і называе сітуацыю «блізкай да крытычнай».

Пра тое, што «рызыкі для расійскіх баз у Сірыі павялічваюцца», у каментарыі расійскаму выданню «Взгляд» гаворыць вайсковы эксперт Юрый Лямін. Як ён тлумачыць, паўстанцы выходзяць на тыя рубяжы, з якіх зручна запускаць дроны-камікадзэ па прыбярэжных гарадах, дзе знаходзяцца базы. Падобныя напады былі і раней, але цяпер паўстанцы могуць іх рабіць часцей і нашмат маштабней.

Павялічыць

«Захоп Хомса можа прывесці да распаду краіны», —

прагназуе Лямін і тлумачыць, што гарады Хама і Хомс — гэта тая вось, на якой трымаюцца сувязі паміж рознымі часткамі Сірыі. Калі паўстанцы прасунуцца далей, то ўзнікне пагроза таго, што ўзбярэжжа будзе адрэзана ад астатняй часткі краіны.

«Сітуацыя ўжо развіваецца па вельмі дрэнным сцэнарыі, і калі баевікоў не стрымаць — тады магчымы катастрафічны сцэнарый: баевікі могуць пайсці часткова на Дамаск, часткова на ўзбярэжжа», — адзначыў эксперт.

Пра тое, што «стаўкі павышаюцца» і «катастрофа ў Сірыі набірае абароты», піша ваенкар Аляксандр Коц. «Калі сірыйцы здадуць гэтаксама лёгка і Хомс, давядзецца задумацца пра эвакуацыю баз», — заўважае ваенкар.

Па яго словах, «пакіданне Хамы ілюструе ўсю глыбіню дэградацыі сірыйскай сілавой машыны».

«Не думаю, што туркі і брытанцы разлічвалі на такі аглушальны поспех. Хутчэй за ўсё, планавалі стварыць для нас пункт напружанасці, на які мы адцягнем частку сваіх рэсурсаў. Але цяпер пагроза нашым базам у Тартусе і Хмейміме становіцца не ілюзорнай», — заўважае ваенкар.

Па словах Коца, пасля такіх поспехаў жадання дапамагчы паўстанцам, якіх ён называе «бармалеямі», «шмат у каго дадасца».

«Дзеля таго, каб выкінуць нас з Блізкага Усходу, цяпер шмат хто можа заплюшчыць вочы на тое, што Хаят Тахрыр аш-Шам — правапераемніца Аль Каіды», — абураецца ваенкар.

«У правінцыі Хама сітуацыя дасягнула катастрафічнага пункту», — панікуе «Рыбарь».

Па яго словах, «яшчэ трошкі, і баевікі змогуць выйсці да авіябазы Т4 уздоўж шашы нумар 40». Улічваючы яе важнасць для праіранскіх груповак, якія на авіябазе размяшчаюць свае беспілотнікі, «Рыбарь» называе сітуацыю «засмучальнай» і дадае, што яна «пагаршаецца імкліва».

Па словах аўтара канала, без падтрымкі расійскай авіяцыі і спецыялістаў адкат Сірыйскай арабскай арміі будзе працягвацца і далей. «Перспектыў для выратавання сітуацыі не тое што няма. Але варыянтаў вельмі мала, і гэта факт», — лічыць «Рыбарь».

Як піша «Глобалистика», падзенне Хамы можа азначаць канец для сірыйскай дзяржавы ў тым выглядзе, у якім яна існавала. Апроч тэрытарыяльных страт, якія рушаць услед, гэта сур'ёзны маральны ўдар па ўрадзе.

Аўтар канала адзначае, што паўстанцы пасля Хамы могуць пайсці ў некалькіх напрамках. Па яго словах, «найбольш верагодным падаецца Хомс, а таксама Латакія для адразання расійскай базы».

Павялічыць

«З улікам таго, што сірыйцы адмовіліся выкарыстоўваць перавагі гарадской забудовы ў Хаме, вельмі мала верыцца ў поспех у Хомсе, але надзея ўсё яшчэ ёсць. У Латакіі ўсё складаней праз горны рэльеф», — піша «Глобалистика» і дадае:

«Калі баевікі змогуць дабрацца да важных сцежак, то сітуацыя стане фатальнай. (…) Урад Башара Асада праспаў вайну, і сітуацыя становіцца ўсё больш крытычнай».

• 37
• 0
• 19
• 1
• 1
• 0
• 0
• 0