Літва плануе працягнуць нацыянальныя санкцыі супраць расіян і беларусаў яшчэ на год, паколькі Расія працягвае вайну ва Украіне. Гэта прадугледжана папраўкай да закона, распрацаванай Міністэрствам замежных спраў, паведамляе LRT.
Закон аб абмежавальных мерах у сувязі з ваеннай агрэсіяй супраць Украіны, абноўлены ў гэтым годзе, дзейнічае да 3 мая 2025 года. МЗС прапануе працягнуць яго дзеянне да 2 мая 2026 года.
«Поўнамаштабная вайна, развязаная Расійскай Федэрацыяй супраць Украіны 24 лютага 2022 года, працягваецца і цяпер, таму прычыны, па якіх быў прыняты закон, не зніклі. Дзеянні Расійскай Федэрацыі аказваюць істотны негатыўны ўплыў не толькі на бяспеку краін-членаў Еўрапейскага саюза і NATO, але і на бяспеку Еўропы ў цэлым», — гаворыцца ў тлумачальнай запісцы да законапраекта.
Што тычыцца саміх абмежавальных мер для грамадзян Расіі і Беларусі, змяненняў не прапануецца.
У інтэрв'ю BNS спікер Сейма Саўлюс Сквярняліс не выключыў, што абмежавальныя меры могуць быць узмоцнены.
«Я не сумняваюся, што мы сутыкнемся з вялікімі выклікамі пасля таго працэсу, які будзе называцца выбарамі ў Беларусі. Пытанне санкцый і маштабаў санкцый, асабліва ў дачыненні да Беларусі, хутчэй за ўсё, зменіцца, але не ў бок паслаблення. Гаворка ідзе пра пагрозу нашай нацыянальнай бяспецы», — сцвярджае ён.
«Усе гэтыя абмежаванні павінны быць разумнымі, не павінны парушаць інтарэсы тых людзей, якіх мы самі запрасілі ў Літву і далі магчымасць часова жыць тут, але ўсё павінна разглядацца праз прызму бяспекі», — сказаў кіраўнік парламента агенцтву BNS.
Каментары