Масленіца замест Казіміра. Як дэградавалі Казюкі ў Гродне, ад якіх засталася толькі назва
Сёлета адроджанаму ў Гродне фестывалю рамеснікаў Казюкі, прымеркаванаму да дня святога Казіміра, спаўняецца 25 год. Аднак гэта важная традыцыя ўсё болей у заняпадзе. Каб сумясціць несумяшчальнае — Масленіцу і Казюкі — абралі дзень, які не падыходзіць ні да аднаго, ні да другога свята, піша Katolik.life.
Апошні раз фестываль ладзілі як самастойнае мерапрыемства ў 2021 годзе, і тады фармальна ён яшчэ захоўваў статус міжнароднага, дзякуючы удзельнікам з Украіны.
Затым фестываль пачаў прадстаўляць толькі беларускіх майстроў, а сам ён стаў часткай масленічных гулянняў, што з'яўляецца нонсэнсам.
Сёлета сітуацыя ўвогуле абсурдная. Казюкі зноў сумясцілі з Масленіцай і прызначылі на дату, калі для свята святога Казіміра (4 сакавіка) яшчэ рана, а для Масленіцы ўжо позна.
Фестываль «Гродзенскі разгуляй», у межах якога адбудуцца Казюкі, запланавалі на 28 лютага. Але галоўны акцэнт — на Масленіцы. У праграме — масленічны парад, канцэрты, лазанне на слуп і спальванне пудзіла.
І гэта пры тым, што сёлета апошні дзень Масленіцы, якая фармальна звязаная з Вялікім постам у праваслаўных, — 22 лютага. А 28 лютага будзе ўжо першая нядзеля Вялікага посту ў Праваслаўнай царкве.
Прыкметаў святкавання Масленіцы з хрысціянскім сэнсам, а не паганскім, не было і раней, аднак даты масленічнага тыдня ў праваслаўных дагэтуль трымаліся. Цяпер жа, каб ізноў сумясціць несумяшчальнае — Масленіцу і Казюкі — абралі дзень, які не падыходзіць ні да аднаго, ні да другога свята.
Таксама няма ніякіх згадак, з нагоды чаго ўвогуле святкуюцца Казюкі: у гонар каталіцкага святога Казіміра, які 4 сакавіка адыйшоў у вечнасць менавіта ў Гродне, — апекуна народаў Вялікага Княства Літоўскага і Польшчы, а таксама рамеснікаў. Гэта падкрэсліваюць падчас знакамітага Казюкаса ў Вільні, дзе ладзяць шэсце з фігурай святога Казіміра.
У Гродне такога не было і раней, цяпер жа няма нават узгадак апекуна рамеснікаў. Таму гродзенскія Казюкі разам з абрадам спальвання пудзіла ствараюць уяўленне, што фестываль нібыта звязаны з паганскай Масленіцай. Ад традыцыі засталася толькі назва.
Каталіцкі біскуп максімальна ўзнёсла ўславіў «Год беларускай жанчыны»
Манашак са Свята-Елісавецінскага манастыра заўважылі ў яшчэ адной краіне «амаральнай Еўропы»
У Магілёве адбылося шэсце да месца масавых рэпрэсій 1930‑х — з іконай расійскага цара і імперскім трыкалорам
Сёлета праваслаўнае духавенства ўпершыню не ўдзельнічала ў малітве за адзінства хрысціян
Цяпер чытаюць
«Кайлас, я іду». Што за беларуска знікла ў жудасным селі ў Непале6
Каментары
[Зрэдагавана]