Літовец, якога абвясцілі на радзіме ў вышук, знайшоўся ў Беларусі — быў «незалежным» назіральнікам на выбарах
Эдыкас Ягелавічус, які знаходзіцца ў вышуку ў Літве па падазрэнні ў дзейнасці супраць дзяржавы, знайшоўся ў Беларусі. Беларускія прапагандысты паказалі яго як «незалежнага назіральніка» на так званых выбарах, якія прайшлі 26 студзеня.
Ягелавічус пахваліў беларускія выбары за тое, што яны праходзяць у «атмасферы свята».
«Такога я нідзе не бачыў. У Літве ты проста прыходзіш і апускаеш бюлетэнь у урну. На ўчастку не грае музыка, ніякія артысты не танчаць і не спяваюць, буфеты не працуюць», — скардзіўся ён.
Ягелавічус раней быў «назіральнікам» на арганізаваным Расіяй «рэферэндуме» на акупаваных тэрыторыях Украіны. Ён таксама быў членам ліквідаванай у 2023 годзе арганізацыі «Міжнародны форум добрасуседства» і паплечнікам асуджанага за шпіянаж на карысць Расіі Альгірдаса Палецкіса, піша LRT.
Па словах прадстаўніка арганізацыі «Еўрапейская платформа за дэмакратычныя выбары» (European Platform for Democratic Elections) Лукаша Кандрацюка, беларускі і расійскі рэжымы выкарыстоўваюць розных маргінальных палітыкаў і актывістаў з-за мяжы для прапагандысцкіх мэт, каб стварыць бачнасць легітымнасці сфальсіфікаваных выбараў.
«Іх малююць як важных асоб у мэтах прапаганды, каб паказаць унутранай аўдыторыі: глядзіце, замежнікі назіралі за выбарамі і заявілі, што яны былі сумленнымі», — сказаў Кандрацюк парталу LRT.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец109
Каментары