Лукашэнка прапанаваў стварыць у Беларусі «цэнтры прыцягнення» для ўсіх канфесій
Аляксандр Лукашэнка прапанаваў стварыць у краіне цэнтры прыцягнення для ўсіх рэлігійных канфесій. Пра гэта ён заявіў 10 лютага на сустрэчы з прадстаўнікамі рэлігійных канфесій. Лукашэнка сказаў, што гэта «тэма, якая апошнім часам яго хвалюе і якой ён жыве».
«І яшчэ адна тэма, якая апошнім часам мяне хвалюе і якой я жыву, калі думаю аб нашым рэлігійным развіцці, міжканфесійным развіцці. Вы ведаеце, што мы сёлета, я думаю, скончым прыводзіць у парадак нашу праваслаўную святыню — Жыровіцкі манастыр, храмы, паселішчы. Я хацеў бы, каб гэта было выдатным цэнтрам праваслаўя.
У сувязі з гэтым я прапаную (і абяцаю, калі вы прыміце рашэнне): мы павінны нашым рэлігіям, якія ў нас існуюць, стварыць адпаведныя цэнтры», — сказаў Аляксандр Лукашэнка.
Паводле яго, гэта павінны быць прасторныя і даступныя для вернікаў святыні. Лукашэнка дадаў, што дзяржава «падставіць плячо іншым канфесіям сапраўды гэтак жа, як і праваслаўнай царкве». «Мы абавязкова дапаможам», — заявіў ён.
Між тым, з 25 верасня 2022 года ў Мінску закрыты касцёл святога Сымона і святой Алены, дзе нібыта здарыўся пажар. Ад зачыненага Чырвонага касцёла патрабуюць амаль 150 тысяч рублёў, стала вядома ў снежні.
Каментары