Паводле ацэнкі арганізацыі Transparency International, у 2024 годзе індэкс успрымання карупцыі ў Беларусі склаў 33 балы са 100. Краіна апусцілася на 114-е месца сярод 180 дзяржаў (у 2023 годзе была 98-й). У 2022 годзе яна займала 91-е месца.
Сярод суседзяў Беларусі найлепшы паказчык у Літвы — 32-е месца (летась 34-е) з індэксам 63. Латвія, Польшча, Украіна і Расія таксама страцілі пазіцыі, асабліва Расія, якая апусцілася на 154-е месца (раней 141-е) з індэксам 22.
Лідарамі рэйтынгу застаюцца Данія, Фінляндыя і Сінгапур, а найгоршыя пазіцыі займаюць Венесуэла, Самалі і Паўднёвы Судан.
У гэтым індэксе ацэньваецца не сам узровень карупцыі як такі, а яе ўспрыманне экспертамі і міжнароднымі арганізацыямі.
Раней рост паказчыка супадаў з паляпшэннем адносін Беларусі з Захадам. У 2013 годзе індэкс быў 29, у 2016 — 40, у 2019 — 45. Пасля 2020 года паказчык пачаў зніжацца.
Каментары