У Польшчы хочуць увесці падатак для бігтэхаў, але ЗША гэта не падабаецца
Польшча не збіраецца адмаўляцца ад працы над падаткам для вялікіх лічбавых кампаній, нягледзячы на тое, што гэта не задавальняе ЗША. Пра сітуацыю распавядае devby.io.
11 сакавіка віцэ-прэм'ер і міністр цыфравізацыі краіны Кшыштаф Гаўкоўскі ў інтэрв'ю Radio Zet заявіў, што Польшча працягвае працаваць над праектам па падатках для бігтэхаў.
Гэта адбылося пасля выказвання амбасадара ЗША ў Польшчы Томаса Роўза аб тым, што даплаты на буйныя ІТ-кампаніі ён лічыць «не вельмі разумным» і «самагубчым» рашэннем. Роўз дадаў, што яно нашкодзіць Польшчы і яе ўзаемаадносінам з ЗША.
Як піша devby, падатак, які рыхтуецца, будзе накіраваны на даходы, якія атрымліваюць тэхнагіганты ў Польшчы, і на падтрымку мясцовых кампаній. У гутарцы з журналістамі Гаўкоўскі адзначыў, што яму «надакучыла», што трэція краіны спрабуюць умяшацца ў заканатворчы працэс у Польшчы.
«Амбасадару варта ведаць, што ў Польшчы менавіта польскія ўлады, а таксама ўрадавыя і парламенцкія інстытуты прымаюць пастановы аб тым, як будзе выглядаць заканадаўчы працэс. Мы ні ад чаго не адмовімся і працягнем праводзіць кансультатыўныя работы, таму што Польшча мае права прымаць рашэнні.
У Польшчы ёсць такое ж права, як і ў Францыі, Вялікабрытаніі і Аўстрыі, якія ўжо ўвялі лічбавы падатак. З чаго б Польшчы над гэтым не працаваць? З чаго б не абмяркоўваць магчымасць таго, каб буйныя карпарацыі, якія зарабляюць тут, плацілі больш падаткаў?» — цытуе міністра Polskie Radio.
Міністр фінансаў і рэгіянальнай палітыкі Польшчы Катажына Пелчыньска-Наленч у каментары каналу TVP Info адзначыла, што ў цэлым падтрымлівае ідэю падобнага падатку, аднак таймінг абраны не самы прыдатны з улікам рызыкі гандлёвай вайны паміж дзвюма краінамі.
Амерыканскі дзяржсакратар Марка Рубіа на выходных абвінаваціў кіраўніка польскага МЗС Радаслава Сікорскага ў хлусні і няўдзячнасці, а Ілан Маск адкрыта нахаміў яму ў сацсетках.
У панядзелак за свайго суайчынніка заступіўся прэм'ер Дональд Туск, які заклікаў заакіянскіх «сяброў» «прыцішыць запал». Новы польскі падатак — яшчэ адна тэма славеснай вайны паміж Варшавай і Вашынгтонам, піша devby.
Цяпер чытаюць
«Я асасін, бл*!» Эксперт-юрыст з СТБ неадэкватна паводзіў сябе на Зыбіцкай. Відэа сабрала мільёны праглядаў — хто ён13
Каментары