У Маладзечанскім раёне вяскоўцы змагаюцца з крамай, дзе прадаюць дрэнныя прадукты
Тое, што адбываецца ў пасёлку Сасновы Бор, мясцовая раёнка апісала пытаннем: «Чаму мы не можам жыць як у горадзе, дзе і цэны іншыя, і дарогі лепшыя, і сметніцы чысцейшыя?»
4 сакавіка 98 жыхароў Сасновага Бору падпісалі зварот, дзе паскардзіліся на вясковую краму: асартымент якой «не змяняецца дзесяцігоддзямі», часта прадукты, асабліва малочка, пратэрмінаваныя.
Падпісанты звароту спадзяваліся на змену — каб на месца прыйшла іншая гандлёвая сетка.
Прадавачка крамы на зварот адказала, што подпісы ў ім сфальсіфікаваныя і зрабіла свой ліст — аб тым, як іншыя жыхары пасёлка яе падтрымліваюць.
Журналістка kraj.by сапраўды заўважыла ў краме парушэнні: некаторыя прадукты з лядоўні не былі падпісаны, у кураняці-бройлера падраная ўпакоўка, мінулы тэрмін прыдатнасці і непрывабны колер прадукту і іншыя праблемы.
Каб вырашыць пытанне з крамай і іншыя вясковыя праблемы, жыхары Сасновага Бору 13 сакавіка зладзілі агульны сход.
Маладыя жыхары вёскі расказалі, што ўжо доўгі час незадаволены прадуктамі ў мясцовай краме.
«Не магу купіць дзіцячую сумесь, падгузнікі, пюрэ або сок для малога. Прыйшла раз-другі — няма, больш не хаджу, езджу ў Маладзечна. Скончыўся маянэз на дзень нараджэння сына, у кастрычніку мінулага года, адправіла дзіця, а ён тэлефануе, што маянэзу няма. Уяўляеце, ніякага!» — выказалася адна з іх.
Іншая жанчына таксама дадала, што «не можа раніцай прачнуцца і пайсці ў краму за чымсьці смачным, даводзіцца ездзіць у горад».
Не падабаюцца жыхарам і тое, дзе ў вёсцы стаяць сметнікі, і што дарогі не робяць. На сход да іх выйшаў старшыня Мясоцкага сельвыканкама Алег Горбач.
Тэма сметнікаў непакоіць Горбача доўгі час, сказаў ён. Праблема з'явілася праз адрозненні ў меркаваннях адносна месца, дзе павінен быць усталяваны смеццевы кантэйнер. Адны хочуць бліжэй да хаты, іншыя — далей.
Як піша супрацоўніца газеты, вечар у Сасновым Бары атрымаўся «насычаным на эмоцыі».
Цяпер чытаюць
У ЗША падумваюць забараніць уезд у краіну грамадзянам Беларусі з іміграцыйнымі і турыстычнымі візамі13
Каментары