У Германіі паліцыя ачапіла раён і пяць гадзін вяла расследаванне забойства. Аказалася, гэта была сэкс-лялька
Мужчына выгульваў сабаку і заўважыў на будпляцоўцы жаночае цела. На месца выклікалі крыміналістаў, аператараў дронаў, судмедэкспертаў і нават рытуальную службу.
Вечарам у суботу ў паліцыю горада Ростак на паўночным усходзе Германіі паступіў экстранны выклік. Мужчына гуляў з сабакам і наткнуўся на абгарэлае жаночае цела.
На месца здарэння выехалі ўсе наяўныя паліцэйскія службы, уключаючы следчых па забойствах, крыміналістаў і судмедэкспертаў, а таксама аператараў дронаў з 3D-сканерам.
Раён ачапілі, пажарныя асвяцілі месца магутнымі пражэктарамі, паліцэйскія фатаграфавалі доказы, а следчыя па справах аб забойствах прасоўваліся да меркаванага цела літаральна па сантыметры, вымяраючы яго рулеткай і дакументуючы даныя, пiша NDR.
Праз пяць гадзін паліцэйскія падышлі ўшчыльную да «ахвяры». Адзін са следчых дакрануўся да «трупа» і адразу зразумеў, што гэта не чалавек — аб'ект быў выраблены з сінтэтычных матэрыялаў.
Аказалася, што гэта была рэалістычная сэкс-лялька. Яе абпалілі, а потым упакавалі ў сумку Ikea і выкінулі на двор. Следчыя мяркуюць, што хтосьці зрабіў гэта спецыяльна, паведамляе Daily Mail.
На той момант на месца паспела прыбыць рытуальная служба, якая павінна была адвезці цела ў морг. Супрацоўнікаў давялося адпусціць, паліцыя забрала ляльку для ўтылізацыі. Расследаванне было спынена.
Паліцэйскія на месцы здарэння прызналіся, што ніколі раней не сутыкаліся з такiм дзіўным выпадкам за ўсю сваю кар'еру.
Каментары