«Адназначна было страшна». Памежнікі пажартавалі з брытанскага тыктокера, які прасіў ДНЖ у Кубракова

Брытанскі блогер Уіл Эгертан зноў прыехаў у Беларусь. Пра прыгоды тыктокера ў салатавых шортах і футболцы мы ўжо расказвалі. У мінулым годзе ён прыязджаў у Беларусь некалькі разоў, яго палюбілі як простыя беларусы, якія пры сустрэчы на вуліцы з радасцю кідаюцца абдымаць Уіла, так і прапагандысты з чыноўнікамі. 

Эгертан здымаў захапляльныя ролікі з розных беларускіх гарадоў, з задавальненнем еў згушчонку, гуляў у футбол і сустракаўся з фанатамі. А калі прыйшоў час з'язджаць, звярнуўся да міністра ўнутраных спраў Івана Кубракова з просьбай дазволіць яму застацца. Чыноўнікі і прапагандысты ўхапіліся за такую магчымасць: Эгертану ў салатавых шортах зладзілі асабістую сустрэчу з Кубраковым. Той на камеру ласкава дазволіў брытанцу пакатацца па Беларусі яшчэ крыху, за што атрымаў ад тыктокера тону кампліментаў.

Але ў канцы года Уілу ўсё ж давялося з'ехаць. Не дапамагла нават кампанія «Дайце хлопцу ДНЖ», якую ён паспрабаваў разгарнуць у сацсетках. Выязджаў з Беларусі брытанец таксама не без прыгод. На мяжы яго развярнулі: ён забыўся аформіць выязную візу. Пакінуўшы Беларусь, тыктокер з'ездзіў у Польшчу, Японію, Кітай і ААЭ, а цяпер зноў апынуўся ў нашай краіне.

Але вяртанне таксама аказалася нервовым. У аэрапорце на пашпартным кантролі Эгертана завялі ў асобны пакой на размову з сур'ёзным памежнікам. Для многіх беларусаў, якія вяртаюцца ў краіну, такая размова звычайна не прарочыць нічога добрага, але Уілу пашчасціла.

Аказалася, памежнікі вырашылі зняць пранк над блогерам для свайго тыктока. У канцы размовы ў пакой увайшоў яшчэ адзін супрацоўнік і падарыў Эгертану ўпакоўку згушчонкі. Нядаўна тыктокер якраз скардзіўся, што ягоныя запасы ласунку скончыліся. Відэа з розыгрышам на канале Памежнага камітэта сабрала ўжо 857 тысяч праглядаў і больш за 1300 каментарыяў.

@borderguards__by @willeggerton_new он вернулся… но что случилось с ним на границе #пограничники #граница #пунктпропуска ♬ оригинальный звук - Пограничная служба Беларуси

Уіл расказаў, што спачатку яму было сапраўды страшна. 

«Ці напужаўся я? Можа быць, я не правяраў. Хваляванне біблейскіх маштабаў. Але ўсё акей, усё добра. Я проста хачу падзякаваць хлопцам, памежнікам, за згушчонку. Добра атрымалася!» — падзяліўся эмоцыямі Уіл. Дарэчы, для сябе на вечнае беларускае пытанне ён ужо адказаў: яму падабаецца рагачоўская, а не глыбоцкая.

@willeggerton_new @Пограничная служба Беларуси спасибо еще раз #приколи #рофл #самолет #аэропорт ♬ оригинальный звук - willeggerton_new

Цяпер у Эгертана ёсць трыццаць дзён, каб падарожнічаць па Беларусі па бязвізе. Калі, вядома, Кубракоў зноў не вырашыць сустрэцца з госцем з Вялікабрытаніі.

• 3
• 2
• 3
• 18
• 0
• 0
• 0
• 0