Канцэрагены ад тытуню застаюцца на сцэнах і мэблі.
Канцэрагены ад тытуню застаюцца на сценах і мэблі.
Сцены аўтамабіляў і памяшканняў, у якіх кураць, утрымліваюць канцэрагенныя рэчывы, што ўжо не маюць паху тытуню і цалкам незаўважныя, але небяспечныя. Таму забарона на курэнне ў грамадскіх месцах, уведзеная ў Еўропе, глыбока абгрунтаваная.
Навукоўцы высветлілі, што першапачаткова бясшкодныя рэчывы, якія знаходзяцца ў паветры памяшканняў, дзе сістэматычна паляць, могуць ператварацца ў канцэрагены з цягам часу.
Рэчывы, якія ёсць у цыгарэтным дыме, у прыватнасці нікацін, асядаюць на паверхнях. Сам нікацін не канцэраген, аднак ён хімічна актыўны і ўзаемадзейнічае з іншымі рэчывамі. У пэўным спалучэнні нікацін пераходзіць у роднасныя яму нітразаміны, а ўжо яны — высокаканцэрагенныя. Іх удыхаюць усе людзі ў памяшканні, нават калі цыгарэтнага дыму ў паветры ўжо і няма. Для такога ўздзеяння ўведзены тэрмін «курэнне праз трэція рукі».
Роднасныя тытуню нітразаміны (tobacco‑specific nitrosamines, TSNA) першапачаткова былі знойдзеныя на паверхнях у аўтамабілях заўзятых курцоў. Потым было праведзенае лабараторнае мадэляванне ўзаемадзеяння рэчываў дыму з паверхнямі і атмасферным паветрам. У якасці мадэлі матэрыялу паверхні была выбраная цэлюлоза. На паверхню з сарбіраваным тытунёвым дымам на працягу трох гадзін уздзейнічалі азоцістай кіслатой у канцэнтрацыі 60 мільярдных доляў (што мадэлюе ўтрыманне ў атмасферы). За час эксперыменту канцэнтрацыя TSNA на паверхні вырасла ў 10 разоў.
Нітразаміны могуць пранікаць у арганізм альбо непасрэдна праз скуру, альбо падчас удыху, альбо ўсмоктвацца праз слізістыя рота і носа.
Нікацін можа захоўвацца на паверхнях унутры памяшканняў на працягу дзён, тыдняў і нават месяцаў.
Дзеці, якія шмат часу праводзяць седзячы на падлозе, падвяргаюцца ўздзеянню шкодных рэчываў, што ўтвараюцца падчас канверсіі нікаціну. Яны трапляюць у арганізм дзяцей праз скуру або падчас удыху. Калі курцы клапоцяцца пра здароўе сваіх дзяцей і блізкіх, яны павінныя ўстрымацца ад курэння ў доме і ў машыне. «Пракураныя» дываны і мэблю наогул трэба прыбраць з дому, таму што яны змяшчаюць вельмі вялікую колькасць «другасных» канцэрагенаў».
Зрэшты, дым і яго рэшткі захоўваюцца ў вопратцы курца, нават калі ён курыць на вуліцы. Таму найлепшы спосаб засцерагчы сябе і сваіх блізкіх — гэта не курыць наогул.
Каментары