Ён выконваў у Сумскай вобласці валанцёрскую місію.
У Сумскай вобласці Украіны, дзе ў апошнія тыдні наступаюць расійскія вайскоўцы, 8 чэрвеня загінуў саліст Адэскай нацыянальнай оперы, заслужаны артыст Украіны Уладзіслаў Гарай. Ён выконваў у Сумскай вобласці валанцёрскую місію — гаворыцца на сайце оперы. Падрабязнасці аб акалічнасцях гібелі артыста не прыводзяцца.
«Голас Уладзіслава Вікенцьевіча ведаў увесь свет, а сэрца належала Украіне. Уладзіслаў быў не толькі талентам сцэны — ён быў прыкладам сілы, годнасці і дабрыні ў жыцці. Нават у самыя змрочныя часы не заставаўся ўбаку — дапамагаў, валанцёрыў, падтрымліваў», — гаворыцца ў паведамленні. Загінулага Уладзіслава Гарая ў ім назвалі тэнарам сусветнага ўзроўню.
Гарай быў членам опернай трупы Адэскага нацыянальнага акадэмічнага тэатра оперы і балета з 1993 года. Ён быў лаўрэатам прэміі нацыянальнага конкурсу камернай музыкі ў Хмяльніцкім, лаўрэатам прэміі Міжнароднага конкурсу вакалістаў імя Антаніна Дворжака (Карлавы Вары, Чэхія). У 2013 годзе атрымаў ганаровае званне Заслужанага артыста Украіны. У рэпертуары спевака было больш за дваццаць оперных партый, у тым ліку Альмавіва («Севільскі цырульнік»), Герцаг («Рыгалета»), Альфрэд («Травіята») і іншыя. У сацсетках спевака шэраг публікацый прысвечаны збору сродкаў для ўкраінскіх вайскоўцаў.
Цяпер чытаюць
Айцішніка з «Варгеймінга» судзілі па расстрэльным артыкуле. Падобна, за падтрымку Украіны — праўда, зрабіць ён нічога не паспеў1
Каментары