На заробкі ў Польшчу цяпер толькі з ДНЖ? Разабраліся, хто можа працаўладкавацца там па новых правілах
Пасля таго, як стала вядома пра змены ў польскім міграцыйным заканадаўстве, пачалі з'яўляцца чуткі пра тое, што нібыта цяпер замежнікі без мясцовага ДНЖ не могуць уладкавацца на працу ў Польшчы. Разабраліся, як насамрэч.
Толькі два тыпы віз даюць права на працу ў Польшчы
Беларусам уладкавацца на працу ў Польшчы стала сапраўды значна складаней, нават калі ўжо ёсць віза, па якой можна легальна знаходзіцца ў краіне.
Выключэнне — віза, атрыманая па карце паляка. Іх трымальнікі па-ранейшаму могуць афіцыйна працаваць у Польшчы без атрымання дазволу на працу і займацца прадпрымальніцкай дзейнасцю на тых жа ўмовах, што і грамадзяне Польшчы.
Уладальнікі ўсіх іншых тыпаў віз, акрамя працоўнай, больш не могуць атрымаць дазвол на працу і, адпаведна, працаваць у Польшчы.
Тым не менш, сам інстытут працоўных віз застаўся, і наяўнасць ДНЖ не з’яўляецца абавязковым патрабаваннем для доступу на рынак працы Польшчы, як гэта адбываецца ў Літве.
Таму беларусы, як і раней, могуць афіцыйна працаваць у Польшчы па працоўнай візе. Але атрымаць яе не так проста, як гэта было раней.
Хутка прыступіць да працы не атрымаецца
Візавая экспертка і рэдактарка Visaflow.live Анастасія Лысакоўская кажа, што,
каб запісацца на падачу на візу ў Мінску, у людзей сыходзіць ад 4 да 6 месяцаў.
У Брэсце і Гродне прасцей. Там рэальна запісацца на візу за адзін-два, максімум тры месяцы.
Экспертка раіць беларусам пры першай магчымасці падаваць дакументы на атрыманне часовага ДНЖ на падставе працы. У Польшчы разгляд заявы на атрыманне ДНЖ цяпер займае шэсць і больш месяцаў.
Пасля падачы дакументаў на атрыманне ДНЖ у пашпарт ставяць адмысловы штамп, з якім можна законна заставацца ў Польшчы нават пасля заканчэння тэрміну візы. Але выязджаць у іншыя краіны ЕС з ім нельга, таму такі варыянт падыходзіць не ўсім — асабліва дальнабойшчыкам, для якіх выезд за межы Польшчы — частка працы.
З такім штампам можна выехаць на радзіму, але для вяртання ў Польшчу трэба будзе мець новую візу, бо аднаго штампа, які пацвярджае факт падачы на ДНЖ, недастаткова для ўезду ў Польшчу.
Многія працоўнымі візамі сапсавалі сабе візавую гісторыю
Але праблемы з запісам — гэта не адзіная складанасць. Лысакоўская адзначае, што павялічылася колькасць адмоў пры выдачы працоўных віз.
«Калі цягам апошніх гадоў у чалавека была працоўная віза, і ён не карыстаўся ёй па мэтавым прызначэнні, то пры новай падачы на працоўную візу з 99% верагоднасцю будзе адмова», — кажа Лысакоўская.
Асабліва ў 2022 — пачатку 2024 года беларусы нярэдка адкрывалі працоўныя візы, не плануючы ўладкоўвацца на працу ў Польшчы. Такая віза рабілася хутка, фэйкавае запрашэнне каштавала нядорага, а сама віза, як правіла, выдавалася адразу на год.
Цяпер калі такі чалавек сапраўды захоча працаваць у Польшчы, то ў яго гэта наўрад ці атрымаецца.
Таксама Анастасія Лысакоўская мяркуе, што калі чалавек атрымае працоўную візу, але не ўладкуецца на працу, то такую візу даволі хутка анулююць. На гэта ўказвае абавязак працадаўцы паведамляць адпаведным органам аб няяўцы на працу ці звальненні. Па новым законе, польскага працадаўцу чакае штраф да 5000 злотых (каля 1170 еўра) за непадачу даных пра замежнага работніка, які больш не працуе ў яго.
Пераехаць у Польшчу з іншай краіны ЕС таксама стала складаней
Яшчэ адна катэгорыя беларусаў, якія апынуліся ў пралёце, — трымальнікі ДНЖ іншых краін Еўрасаюза. Да 1 чэрвеня 2025 года беларусы, як і іншыя замежнікі з трэціх краін, мелі магчымасць прыехаць у Польшчу з дзейным ДНЖ або ПМЖ, выдадзеным любой іншай краінай ЕС, атрымаць дазвол на працу, прыступіць да яе і пасля падаваць дакументы на атрыманне польскага ДНЖ на падставе працы.
Цяпер такі кейс даступны толькі для асоб, якія карыстаюцца правам мабільнасці на тэрыторыі Польшчы. Пад іх, пры пэўных умовах, могуць трапіць уладальнікі ДНЖ тыпу EU Blue Card і статусу пастаяннага рэзідэнта ЕС.
То-бок калі ўмоўны айцішнік ці іншы высокакваліфікаваны спецыяліст з Blue Card захоча пераехаць у Польшчу, напрыклад, з Балгарыі або Літвы, то ў яго гэта можа атрымацца. А вось будаўнік ці кіроўца-дальнабойшчык такой магчымасці больш не мае.
Цяпер умоўны будаўнік або дальнабойшчык, каб змяніць краіну працы на Польшчу, мусіць спачатку атрымаць польскую працоўную візу і ўжо на яе падставе прыступаць да працы ў Польшчы. Гэтыя новаўвядзенні значна ўскладняюць пераезд у Польшчу па працы з іншых краін ЕС.
Каментары
Или у меня информация устаревшая или у нн неправдивая.