У Жлобіне ліквідуюць знакамітую фабрыку, дзе робяць штучнае футра
Тэлеграм-канал «Свабодны Жлобін» 5 жніўня паведаміў, што ў райцэнтры ходзяць чуткі аб ліквідацыі прадпрыемства БЕЛФА — найбуйнейшага ў Еўропе вытворцы штучнага і ваўнянага футра на трыкатажнай аснове. Паводле звестак канала, пра закрыццё фабрыкі «гавораць ужо як мінімум месяц», і ліквідацыя прадпрыемства можа адбыцца «ўжо гэтай восенню». Ніякай афіцыйнай інфармацыі пра гэта не было, таму «Флагшток» праверыў чуткі.
Фабрыка знакамітая тым, што яе футра выкарыстоўвалі мясцовыя ўмельцы для шыцця мяккіх цацак, якімі славіўся Жлобін — асабліва ў 2000-х гадах, калі на вакзале райцэнтра прадаўцы яркіх цацак масава атачалі цягнікі.
Прадпрыемства, якое паспяхова працавала больш за 40 гадоў, у апошнія гады сапраўды стала «фабрыкай па вытворчасці страт». Пра гэта сведчаць штогадовыя справаздачы аб дзейнасці прадпрыемства, якія вывучыў «Флагшток».
Па выніках 2024 года чыстыя страты прадпрыемства сталі рэкорднымі і склалі 3 мільёны 159 тысяч рублёў (больш за 1 мільён даляраў). Па выніках 2023 года — 2 мільёны 276 тысяч рублёў. 2022 год быў для фабрыкі больш паспяховым, але ў плюс выйсці ўсё адно не ўдалося — страты склалі 291 тысячу рублёў. А яшчэ раней, у 2021 годзе, прадпрыемства спрацавала ў мінус 2 мільёны 859 тысяч рублёў.
Мяркуючы па даных у справаздачах, фабрыка магла ўзяць кароткатэрміновы і доўгатэрміновы крэдыты. Але прадае яна менш, чым вырабляе, таму змяншаецца прыбытковасць. На фоне гэтага адбываецца закупка абсталявання, на прадпрыемстве запаўняюцца склады гатовай прадукцыяй.
«Працуюць так, нібы ніякага мінусу няма. У нармальным свеце яны б перастройвалі працэсы. Але ў Беларусі прадпрыемствы могуць функцыянаваць з любымі мінусамі, пакуль іх хоча датаваць дзяржава», — пракаментаваў сітуацыю эксперт.
Пра цяперашнюю колькасць работнікаў на БЕЛФА не паведамляецца, але вядома, што ў 2022 годзе тут працавала 345 чалавек. Свежых вакансій фабрыка даўно не публікавала, на званок у аддзел кадраў ніхто не адказаў.
Затое ў іншым падраздзяленні, куды «Флагшток» патэлефанаваў ад імя пакупніка, прызналіся: прадпрыемства сапраўды рыхтуюць да закрыцця, вытворчасць спынілася:
«Ліквідацыйны перыяд пачнецца з 11 жніўня. Працягнецца да 10 мая з магчымым наступным падаўжэннем. Фабрыка ўжо нічога не робіць, вытворчасць стаіць. Работнікаў пераводзяць каго на 2/3, каго за свой кошт».
Цяпер прадпрыемства вядзе распродаж прадукцыі, якая назапасілася на складах.
Каментары