Беларус, якога затрымлівалі ў Грузіі, атрымаў дакумент для жыцця там на год
Грамадзянін Беларусі, якога раней затрымалі ў Грузіі пасля спробы падаць заяву на атрыманне прытулку, 7 жніўня атрымаў дакумент, што дазваляе яму легальна знаходзіцца ў краіне на працягу аднаго года. Пра гэта ён расказаў выданню «Позірк».
Мужчына, якога ў матэрыяле называюць Міхаілам (імя зменена з меркаванняў бяспекі), пераехаў у Грузію яшчэ ў 2016 годзе. Ён вучыўся ў Мінскім духоўным вучылішчы і працаваў у царкве, а ў Грузіі стаў шэф-кухарам. Пасля падзей 2020 года актыўна падтрымліваў пратэсты, удзельнічаў у акцыях салідарнасці, вёў сацсеткі.
Пасля таго як у 2020 годзе скончыўся тэрмін дзеяння яго пашпарта, Міхаіл не змог вярнуцца ў Беларусь, бо гэта было небяспечна. Ён не змог аформіць новы дакумент і доўгі час жыў у Грузіі без легальнага статусу. У выніку, калі ён звярнуўся ў міграцыйны дэпартамент, яго заяву на прытулак прынялі, але аформіць не паспелі — і адразу пасля выхаду з будынка мужчыну затрымалі.
Міхаіла накіравалі ў цэнтр для мігрантаў, дзе ён правёў некалькі тыдняў у цяжкіх умовах. Умяшанне праваабаронцы Рамана Кісляка і адвакатаў дапамагло — яны даказалі, што мужчына не парушаў закон і падаў заяву належным чынам. Суд вырашыў вызваліць яго пад абавязак рэгулярна адзначацца ў міграцыйным дэпартаменце.
Цяпер Міхаіл мае ID-картку, якая дазваляе яму афіцыйна працаваць, атрымліваць медыцынскую дапамогу і нават уступіць у Грузіі ў шлюб. Аднак мера стрымання (абавязак адзначацца) пакуль не знятая.
Міхаіл лічыць, што зрабіў памылку, калі адклаў падачу на прытулак, спадзеючыся, што сітуацыя ў Беларусі хутка зменіцца. На жаль, гэтага не адбылося. Ён падкрэслівае, што хоць цяпер і мае дакумент, сітуацыя ў Грузіі становіцца ўсё больш складанай для беларусаў, асабліва з улікам палітычнага курсу ўладаў, што падтрымліваюць Лукашэнку і канфліктуюць з Захадам.
У Грузіі сёння жыве каля 12 тысяч беларусаў, якія выехалі з Беларусі з-за палітычнага пераследу. Але гэтая колькасць паступова скарачаецца.
Каментары