У гаспадарцы пад Гроднам шосты год вырошчваюць ягады годжы. У нашым клімаце гэта няпроста
У філіяле «Парэчанка» ААТ «Гродзенскі мясакамбінат» ужо некалькі гадоў праводзяць эксперымент па вырошчванні ягад годжы — экзатычнай расліны, вядомай сваімі карыснымі ўласцівасцямі ва ўсім свеце, піша «Гродзенская праўда».
Праект стартаваў у 2019 годзе, калі ў філіяле былі пасаджаныя першыя кусты. Цяпер на 40 сотках расліны пакрытыя ярка-аранжавымі пладамі, якія прыцягваюць увагу сваім колерам і экзатычным выглядам.
Аднак беларускі клімат стварае немалыя цяжкасці. Як расказаў начальнік сельскагаспадарчага ўчастка №1 Валерый Матыс, надвор’е робіць свае карэкціроўкі ў працэс вырошчвання.
Другі год запар надвор’е не спрыяе поўнаму фармаванню ўраджаю: калі да жніўня ягады добра наліваюцца сокам пад сонцам, то з пачаткам дажджоў і пахаладання ў верасні плады пачынаюць вянуць. Гэта ўплывае на колькасць і якасць канчатковага ўраджаю.
Нягледзячы на праблемы, аграрыі не збіраюцца адмаўляцца ад вырошчвання годжы. Па словах Валерыя Матыса, эксперыменты ў сельскай гаспадарцы заўсёды рызыкоўныя, але яны даюць магчымасць удасканаліць тэхналогіі і паспрабаваць нешта новае. Плануюцца розныя меры для захавання ўраджаю: паляпшэнне ўгнаенняў, выкарыстанне сучасных сродкаў абароны раслін і эксперыменты з тэхналогіямі.
З батанічнага пункту гледжання годжы — гэта невялікае дрэўца або куст вышынёй ад 1 да 4 метраў. Плады спеюць са жніўня па кастрычнік. Ягады ў сырым выглядзе небяспечныя для сістэмы стрававання, таму іх лепш не есці непасрэдна з куста. Падчас збору выкарыстоўваюць пальчаткі, каб пазбегнуць раздражнення скуры. Затое пасля сушкі ягады становяцца бяспечнымі і вельмі карыснымі.
Сушаныя ягады годжы маюць салодка-кіслы смак і прыемны водар. Тысячагоддзі яны выкарыстоўваліся ў традыцыйнай кітайскай медыцыне, дзе ім прыпісвалі здольнасць замаруджваць старэнне, падтрымліваць здароўе вачэй, печані, нырак і лёгкіх. Сучасныя даследаванні пацвярджаюць, што годжы багатыя антыаксідантамі, вітамінамі і мінераламі.
Ягады можна ўжываць самастойна або дадаваць у стравы: кашы, ёгурты, смузі, а таксама ў сумесі «суперпрадуктаў». У «Парэчанцы» спадзяюцца, што з часам беларускія годжы будуць вырошчвацца ў прамысловых маштабах і з’явяцца на паліцах мясцовых крамаў, станоўча ўплываючы на разнастайнасць прадукцыі і здароўе спажыўцоў.
Халадзец, паляндвіца, сала… Беларускія «суперфуды», з якімі лягчэй і здаравей перажыць халодную зіму
У цэнтры Скідзеля лось прабраўся ў двор і з'еў усе буякі
«Гектар прыносіць каля $20 000». Буяковы фермер расказаў, як можна зарабіць на ягадах у Беларусі
У Беларусі пачалі прадаваць вінаград «са смакам цукровай ваты». Што за ён?
Цяпер чытаюць
Круіз на цеплаходзе «Белая Русь» па рэках Палесся каштуе як адпачынак у Турцыі. Але каюты на вясну-лета амаль выкупленыя6
Каментары