Іван Эйсмант пахваліўся, што «Інтэрбачанне» ўстанавіла ў Беларусі рэкорд па тэлепраглядах
«У момант галасавання кожны другі з уключаных тэлевізараў быў на кнопцы «Беларусь 1», — запэўнівае кіраўнік БТ. Праўда, гэты пік быў дасягнуты ўначы, калі многія каналы ўжо згарнулі вяшчанне, а іх аўдыторыя пайшла спаць.
Як заўважыў кіраўнік Белтелерадыёкампаніі Іван Эйсмант у новым выпуску праграмы «Скажынемаўчы», доля тэлеаўдыторыі, якая глядзела музычны конкурс «Інтэрбачанне», была анамальна вялікая.
«Доля 27,3 на маёй памяці — рэдкі выпадак. На піку — 50. Гэта значыць, што там, дзе вымяраецца ў нас тэлеглядзенне, — гэта гарады [з насельніцтвам] 100 тысяч і вышэй, — у момант галасавання кожны другі з уключаных тэлевізараў быў на кнопцы «Беларусь 1».
Усе чакалі, дык хто ж выйграе «Інтэрбачанне». Для першага конкурсу гэта крута. Гэта нашмат лепш, чым у нас ішло «Еўрабачанне». Пад 50 доля — гэта проста нешта…».
Доля — гэта аўдыторыя канкрэтнай тэлевізійнай праграмы, выражаная ў працэнтах ад насельніцтва, якое глядзіць тэлевізар у канкрэтны момант.
Анамальныя лічбы, пра якія распавядае Іван Эйсмант, тэарэтычна маглі быць рэальнасцю. Але асноўная прычына ў тым, што момант галасавання, калі быў зафіксаваны «рэкорд», быў пасярод ночы. Эйсмант не кажа пра абсалютную колькасць гледачоў, ён згадвае толькі адносную. Натуральна, што астатнія каналы а першай ці другой гадзіне ночы не глядзіць амаль ніхто.
Аднак Эйсмант упэўнены, што такі «поспех» — яскравы адказ на забароны і спробы ізаляцыі:
«У XXI стагоддзі немагчыма ўзяць нас, я маю на ўвазе Беларусь і Расію, выкрэсліць з жыцця. Мы знаходзімся ў ізаляцыі.
Сышоў біятлон, Кубак свету — з такімі ж рэйтынгамі, а то і больш, ідзе біятлон — кубак Садружнасці з Расіяй.
Сышоў чэмпіянат свету па хакеі — паглядзіце, што робіцца з мінскім «Дынама» на «Мінск-арэне».
Сышло «Еўрабачанне» — [«Інтэрбачанне»] яшчэ круцей. Людзям яшчэ цікавей. Гэта нешта новае».
Цяпер чытаюць
Той самы масажыст расказаў, навошта здымаў голых кліентак9
Каментары
Правайдэр лічбавага тэлебачання найбольш распаўсюджаных стандартаў DVB-C, DVB-T і DVB-S/S2 ня мае адваротнага канала сувязі з абаненцкай прыладай, ня кажучы ўжо пра выпадкі аналагавай трансляцыі. Таму ён ніякім чынам не бачыць, хто і што глядзіць і глядзіць лі ўвогуле, каб атрымаць нейкую статыстыку. Гэта магчыма толькі для інтэрактыўнага тэлебачання альбо экзатычных стандартаў сямейства DVB з адваротнай сувяззю і адпаведнымі тэхнічнымі прыладамі на базе мабільнай сувязі. Але гэта далека ня большасць беларускіх тэлевізараў.