Адзін з беларускіх гарадоў застаўся без ацяплення, бо акурат цяпер дайшлі рукі да замены цеплатрасы
У двух населеных пунктах Мінскай вобласці не ўключылі ацяпленне, якое павінны былі па графіку запусціць 29 верасня. Без цяпла засталіся жыхары горада Фаніпаль і прыгараднай вёскі Вязань. Прычына ў замене акурат цяпер адзінай цеплатрасы, якая ідзе ад кацельні да жылой часткі горада і вёскі, піша Tochka.by.
Што прывяло да сітуацыі, у якой беларусы засталіся без ацяплення ў халады, расказаў прадстаўнік падраднай арганізацыі ТАА «МалесБуд» Віталь Чыркоўскі.
Чаму рамантуюць восенню
Цеплатраса замацаваная на канструкцыях пешаходнага моста праз чыгунку. Цяпер адначасова праходзяць яго рэканструкцыя і пераўрэзка сістэмы цеплазабеспячэння.
Але і мост, і цеплатраса даўно знаходзяцца ў аварыйным стане. Першы быў закрыты па гэтай прычыне яшчэ ў 2018 годзе.
Цеплатрасу, па словах Чыркоўскага, праклалі ў 1981-м, а тэрмін яе эксплуатацыі не павінен перавышаць 30 гадоў. Атрымліваецца, скончыўся ён прыкладна ў 2011 годзе.
«Труба ўжо мела 100%-ны знос, яна цякла. Рана ці позна яе ўсё адно давялося б мяняць», — адзначыў прадстаўнік падраднай арганізацыі.
Паводле інфармацыі партала fanipol.by, рэканструкцыю моста так доўга не праводзілі, таму што не маглі вызначыць, каму ён належыць. Гэтае пытанне вырашылі ў 2020 годзе праз суд — канструкцыю перадалі на баланс Дзяржынскай ЖКГ. Пасля гэтага з'явілася прававая аснова для рамонту, але работы пачаліся толькі праз пяць гадоў, у 2025-м.
І рэканструкцыю моста, і пераўрэзку цеплатрасы праводзяць восенню па плане, бо перанесці гэтыя работы на зіму тэхнічна немагчыма, а пачаць раней не дазвалялі ўзгадненні з Беларускай чыгункай.
Калі дадуць ацяпленне
Па словах Чыркоўскага, актыўныя работы на мосце пачаліся ў жніўні, адразу пасля атрымання дазволу ад БЧ.
Хоць для работ і задзейнічалі вялікую колькасць спецыялістаў, працэс ускладняецца ўмовамі. Паколькі цеплатрасу пракладваюць над чыгуначнымі пуцямі, падрадчыкі працуюць толькі ў кароткія тэхналагічныя «вокны» — па дзве гадзіны днём і дзве гадзіны ноччу. Акрамя таго, у непагадзь працы спыняюцца, бо з-за дажджу можа з'явіцца небяспечная электрычная дуга.
Нарматыўны тэрмін замены цеплатрасы складае 40 каляндарных дзён, але падрадчыкі і Дзяржынская ЖКГ імкнуцца паскорыць працэс. Паводле іх прагнозу па стане на 30 верасня, ацяпленне ў Фаніпалі і Вязані плануюць запусціць да 4‑5 кастрычніка, калі работам не перашкодзяць умовы надвор'я.
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ5454
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ54
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4949
Каментары