МЗС заклікала ЕС вярнуцца ў рэчышча дыялогу і зняць усе абмежаванні
Беларусь заклікае ЕС вярнуцца ў рэчышча дыялогу і зняць усе незаконныя абмежаванні, заявіў намеснік міністра замежных спраў Ігар Секрэта падчас выступлення на ўніверсальным перыядычным аглядзе па правах чалавека ў Жэневе, піша БелТА.
Беларусь на мерапрыемстве прадстаўленая дэлегацыяй, у склад якой увайшлі ўпаўнаважаны ў справах рэлігій і нацыянальнасцей, прадстаўнікі Генпракуратуры, Нацыянальнага статыстычнага камітэту, МЗС, міністэрстваў інфармацыі, юстыцыі, працы і сацыяльнай абароны.
Ігар Секрэта падкрэсліў, што Беларусь з’яўляецца сацыяльна арыентаванай дзяржавай, дзе «ў цэнтры ўвагі чалавек, яго інтарэсы і патрэбы, а ў краіне эфектыўна працуе развітая сістэма спецыялізаваных дзяржаўна-грамадскіх інстытутаў па абароне і стымуляванні розных катэгорый правоў чалавека».
«Сістэма сацыяльнай абароны заслужана застаецца візітнай карткай нашай краіны. Дзякуючы паслядоўным намаганням дзяржавы забяспечваецца ўстойлівы ўзровень сацыяльнай абароненасці насельніцтва», — сказаў намеснік міністра МЗС. «Даступная і эфектыўная сістэма аховы здароўя — гэта найважнейшы прыярытэт дзяржаўнай палітыкі.
У Беларусі кожны грамадзянін, я падкрэсліваю, кожны грамадзянін незалежна ад узроўню дабрабыту, свайго сацыяльнага становішча мае магчымасць бясплатна атрымаць любы від медычнай дапамогі, у тым ліку самай высокатэхналагічнай. Гэта тая асаблівасць, якой можа пахваліцца далёка не кожная краіна нават у Еўропе», — сказаў ён.
Беларусь мае адзін з самых нізкіх паказчыкаў мацярынскай, дзіцячай і моладзевай смяротнасці ў свеце і ўваходзіць у лік 25 найлепшых краін для мацярынства.
«Гэтыя паказчыкі маглі б быць яшчэ больш высокімі, калі б не аднабаковыя прымусовыя захады, уведзеныя валюнтарысцкім чынам шэрагам заходніх краін у дачыненні Беларусі. Палітыка санкцыйнага ціску, якую прасоўваюць гэтыя краіны, парушае эканамічныя і сацыяльныя правы не толькі беларускіх грамадзян, але і грамадзян многіх іншых краін. Бо ўведзеная, напрыклад, забарона на выкарыстанне паветранай прасторы Беларусі робіць небяспечнай грамадзянскую авіяцыю і сумнеўнай «зялёную ўгоду» Еўрапейскага саюза. Захадам закрытая большасць (а дзесьці і ўсе, напрыклад Літвой) наземных памежных пераходаў», — сказаў Ігар Секрэта. У выніку такога злоўжывання геаграфічным становішчам з боку заходніх суседзяў Беларусі відавочныя гуманітарныя і эканамічныя страты, канстатаваў ён.
Разам з тым Беларусі ўдалося пераарыентаваць сваю эканоміку і выбудаваць сістэму, якая забяспечвае грамадзянам годны ўзровень якасці жыцця. «У той жа час мы заклікаем ЕС вярнуцца ў рэчышча дыялогу і зняць усе незаконныя абмежаванні, бо такім дзеянням не месца ў сучасным цывілізаваным свеце», — заявіў намеснік міністра МЗС.
«Беларусь мае намер і надалей падтрымліваць высокія стандарты ў галіне правоў чалавека, накіраваныя на сацыяльную абарону, эканамічную стабільнасць і палітычнае адзінства беларускіх грамадзян», — запэўніў Ігар Секрэта.
Цяпер чытаюць
«Хачу ўзяць інтэрв’ю» — «Не» — «Давайце я вас сфатаграфую» — «Не». Бяляцкі расказаў пра сустрэчу ў калоніі з Пратасевічам4
Каментары