Віктар Лукашэнка дамогся перамоваў з новай кіраўніцай Міжнароднага алімпійскага камітэта
Першыя перамовы Віктара Лукашэнкі, які ўзначальвае Нацыянальны алімпійскі камітэт Беларусі, і кіраўніцы Міжнароднага алімпійскага камітэта Кірсці Ковентры, якую абралі на пасаду ў сакавіку, прайшлі па відэасувязі.
Згодна з паведамленнем НАК, Віктар Лукашэнка падчас размовы паскардзіўся, што беларускі спорт перажывае «адзін з самых няпростых перыядаў у гісторыі».
«Абмежаванні закранулі не толькі спартсменаў вышэйшага ўзроўню, але і юных атлетаў, якія толькі пачынаюць шлях у вялікім спорце», — сказаў Лукашэнка.
Ён выступіў за тое, што спорт «павінен заставацца па-за палітыкай», а таксама выказаў надзею на ўдзел беларускіх спартсменаў у міжнародных спаборніцтвах.
Паводле паведамлення НАК, прэзідэнт МАК Кірсці Ковентры заявіла, што зносіны з прэзідэнтам НАК Беларусі і яго камандай прайшлі добра, а МАК мае намер падтрымліваць беларускіх спартсменаў.
«Бакі адзначылі канструктыўны і стабільны характар дыялогу, выказаўшы намер працягваць рэгулярныя перамовы і сумесна знаходзіць рашэнні па ўсіх актуальных пытаннях», — гаворыцца ў паведамленні.
Беларускія спартсмены на дадзены момант адхіленыя ад большасці міжнародных спаборніцтваў праз падтрымку Аляксандрам Лукашэнкам расійскага ўварвання ва Украіну ў 2022 годзе. У пачатку 2025 года Віктар Лукашэнка быў зноў абраны прэзідэнтам НАК, і МАК прызнаў яго прызначэнне на гэтую пасаду.
У ліпені было паведамленне, што МАК схіляецца да таго, каб дапусціць беларускіх спартсменаў да ўдзелу ў зімовых Алімпійскіх гульнях.
Цяпер чытаюць
Адстаўны міністр-карупцыянер прадае рэспектабельны катэдж каля Драздоў. Просіць $2 мільёны3
Каментары