Кіраўнік МЗС Азербайджана паведаміў пра «сур'ёзныя пытанні» да Масквы праз закрыццё справы аб катастрофе лайнера AZAL
Спыненне Следчым камітэтам Расіі крымінальнай справы аб факце катастрофы самалёта AZAL выклікае ў Азербайджана сур’ёзныя пытанні. Як паведамляе Report, пра гэта заявіў міністр замежных спраў Джэйхун Байрамаў, адказваючы на пытанні журналістаў на брыфінгу аб выніках года.
Паводле слоў міністра, Следчы камітэт Расіі накіраваў у Азербайджан ліст з вынікамі расследавання авіякатастрофы, змест якога выклікаў здзіўленне:
— У лісце ўказвалася, што крымінальная справа ўжо спыненая. Безумоўна, такі крок выклікае ў нас вельмі сур’ёзныя пытанні, — адзначыў Байрамаў, дадаўшы, што на гэты ліст быў накіраваны афіцыйны адказ адпаведных азербайджанскіх органаў.
Байрамаў падкрэсліў: Азербайджан чакае выканання Расіяй сваіх абавязанняў у сувязі з гэтым інцыдэнтам.
— Учора была гадавіна трагедыі, я выказваю спачуванні сем'ям загінулых. Факт знішчэння самалёта праз час быў прызнаны расійскай стараной, а таксама было заяўлена аб выплаце кампенсацый. Гэта была важная заява. Мы чакаем, што гэты працэс будзе даведзены да канца, — падкрэсліў міністр.
25 снежня 2024 года самалёт Embraer 190 «Азербайджанскіх авіяліній» (AZAL), які выконваў рэйс Баку — Грозны, пацярпеў катастрофу за 3 км ад Актаў у Казахстане. На борце самалёта знаходзіліся 67 чалавек. У выніку катастрофы загінулі 38 чалавек.
Згодна з папярэднімі звесткамі расследавання, пры падлёце да Грознага самалёт атакаваў расійскі сродак СПА «Панцыр-С». Акрамя таго, праз выкарыстанне расійскім бокам сродкаў радыёэлектроннай барацьбы была цалкам паралізаваная сістэма сувязі азербайджанскага самалёта. З гэтай прычыны борт знік з радараў у паветранай прасторы Расіі.
На сустрэчы з прэзідэнтам Азербайджана Ільхамам Аліевым у Душанбэ 9 кастрычніка прэзідэнт РФ Уладзімір Пуцін прызнаў, што спрацавала расійская сістэма СПА і выпушчаныя дзве ракеты ўзарваліся, знішчыўшы азербайджанскі самалёт. Пуцін абяцаў, што расійскі бок выплаціць усе належныя кампенсацыі і дасць прававую ацэнку дзеянням усіх службовых асоб.
Прэзідэнт Азербайджана Ільхам Аліеў не прымаў удзел у нефармальным саміце СНД у Санкт-Пецярбургу 22 снежня, хаця звычайна наведваў яго. У адміністрацыі азербайджанскага прэзідэнта паведамілі, што ён не будзе ўдзельнічаць у саміце «праз шчыльны працоўны графік».
Цяпер чытаюць
Уводзяць адказнасць за прапаганду гомасэксуальнасці, бяздзетнасці, а таксама за незаконнае прадстаўленне Беларусі на міжнароднай арэне20
Каментары