На Кіпры знайшлі мёртвае цела, якое можа належаць Уладзіславу Баўмгертнеру
На Кіпры, у аддаленым прыбярэжным раёне паміж пасёлкамі Пісуры і Аўдзіму, знайшлі цела, якое можа належаць знікламу расійскаму бізнэсмену Уладзіславу Баўмгертнеру. Пакуль чакаюць афіцыйнага пацвярджэння гэтага.
Цела знайшлі на цяжкадаступным, скалістым участку ўзбярэжжа, дзе раней пошукавыя групы канцэнтравалі свае пошукі.
Уладзіслаў Баўмгертнер, былы генеральны дырэктар расійскай кампаніі «Уралкалій», знік 7 студзеня. Апошні раз яго бачылі ў Лімасоле, калі ён сядаў у таксі да Пісуры.
Пошукавая аперацыя была ўскладненая зімовымі бурамі і ўключала выкарыстанне дронаў і ўдзел супрацоўнікаў брытанскіх вайсковых баз, размешчаных на Кіпры. Паколькі цела знаходзіцца ў моцна пашкоджаным стане, для дакладнай яго ідэнтыфікацыі могуць спатрэбіцца ДНК-тэсты або параўнанне запісаў дантыстаў.
Па звестках выдання «Фонтанка», Баўмгертнера пасля знікнення пачалі шукаць у гарах і ў выніку знайшлі ў цясніне. Ён нібыта актыўна займаўся скалалажаннем і ў гэты раз, як мяркуецца, вырашыў пераадолець чарговы маршрут. У дзень, калі Баўмгертнер задумаў гэта зрабіць, на Кіпры было ветрана.
Пасля знікнення прадпрымальніка выказваецца шмат меркаванняў, што яно невыпадковае. Аднак і блізкія да Баўмгертнера людзі, і мясцовая паліцыя ад пачатку схільныя лічыць, што гэта ўсё ж такі няшчасны выпадак.
Баўмгертнер шмат гадоў таму быў звязаны адным з эпізодаў сваёй біяграфіі з Беларуссю. Калі ў 2013 годзе ён прыляцеў у Беларусь па запрашэнні тагачаснага прэм'ер-міністра Міхаіла Мясніковіча, яго арыштавалі. Трымалі ў СІЗА КДБ.
Ягонаму арышту папярэднічаў беларуска-расійскі калійны канфлікт, які пачаўся пасля таго, як «Уралкалій» абвясціў пра спыненне продажаў праз сумеснае з Беларуссю ЗАТ «Беларуская калійная кампанія». Праз гэтага трэйдара ажыццяўлялі продажы і «Уралкалій», і дзяржпрадпрыемства «Беларуськалій». Пры гэтым абодва бакі абвінавачвалі адзін аднаго ў няўзгодненых продажах у абход БКК.
Першапачаткова Баўмгертнера абвінавацілі ва злоўжыванні ўладай і службовымі паўнамоцтвамі, затым абвінавачванне было дапоўнена крадзяжом. Пасля бізнэсмена дэпартавалі ў Расію, дзе ў дачыненні да яго таксама была распачата крымінальная справа. Пазней справу закрылі «ў сувязі з адсутнасцю ў яго дзеяннях складу злачынства».
У 2015‑2017 гадах Баўмгертнер працаваў на пасадзе гендырэктара партовай кампаніі Global Ports. Пасля ўзначальваў швейцарскую кампанію Alevo.
Цяпер чытаюць
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма16
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары