У Беларусі прыдумалі, як рабіць жаночыя пракладкі з крухмалу
Беларускі брэнд Lino кампаніі «МедЛён» распрацаваў жаночыя гігіенічныя пракладкі, у якіх выкарыстоўваецца матэрыял на аснове бульбянога крухмалу. Распрацоўшчыкі імкнуліся стварыць сапраўды натуральны прадукт, які быў бы экалагічным і адначасова надзейным у выкарыстанні, піша «Мінская праўда».
Праблема заключалася ў тым, што нават «натуральныя» сродкі гігіены звычайна маюць у складзе пластык, які выкарыстоўваецца як воданепранікальны пласт. Менавіта з-за яго такія вырабы практычна не раскладаюцца ў прыродзе і могуць захоўвацца сотні гадоў. Таму тэхнолагі пачалі шукаць альтэрнатыву і звярнулі ўвагу на крухмал з кукурузы і бульбы, з якога можна атрымаць спецыяльны біяраскладальны палімер.
У працэсе вытворчасці крухмал праходзіць складаную апрацоўку і ператвараецца ў вельмі тонкую мембранную плёнку. Яна выконвае тую ж функцыю, што і поліэтылен, — абараняе ад працякання, але пры гэтым здольная раскладацца. У яе структуры ёсць мікраскапічныя поры: вадкасць праз іх не праходзіць, але пара можа выходзіць, таму матэрыял «дыхае» і не стварае парніковага эфекту для скуры.
Іншыя пласты вырабу таксама зроблены з натуральных матэрыялаў. Верхні пласт складаецца з сумесі бавоўны і лёну, які мае натуральныя антысептычныя ўласцівасці. Пры апрацоўцы сыравіны замест хлорнага адбельвання выкарыстоўваецца тэхналогія з актыўным кіслародам.
Падчас распрацоўкі ўзнікла нямала цяжкасцяў. Лён сам па сабе даволі цвёрды, таму яго давялося спецыяльна апрацоўваць і змешваць з бавоўнай, каб матэрыял стаў мяккім. Акрамя таго, палімеры з крухмалу больш крохкія за звычайны пластык, таму спецыялістам трэба было знайсці баланс паміж трываласцю і тонкасцю плёнкі, а таксама распрацаваць клейкі пласт, сумяшчальны з натуральнымі кампанентамі.
У выніку атрымалася прадукцыя, якая раскладаецца значна хутчэй за традыцыйныя аналагі. Матэрыялы на аснове крухмалу паступова ператвараюцца ў ваду, вуглякіслы газ і біямасу, таму менш шкодзяць навакольнаму асяроддзю. Так бульба, звыклая для беларускай кухні, знайшла нечаканае прымяненне ў сучасных экалагічных тэхналогіях.
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма16
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары
У́ бульбе крухмалю амаль 30% , гэта небясьпечна .