Беларуска паставіла імплант у руку для кантрацэпцыі. Што гэта такое?
Імплант для кантрацэпцыі — гэта невялікі стрыжань з гармонам, які ўжыўляюць пад скуру. На сёння такія лічацца адным з самых перадавых метадаў кантрацэпцыі. Распыталі беларуску пра досвед устаноўкі імпланта і асаблівасці жыцця з ім. А таксама пацікавіліся ў доктара, якая альтэрнатыва на сёння найбольш эфектыўная.
Кантрацэпцыйны імплант такога тыпу ўжыўляецца ў руку — мяккі пластыкавы стрыжань даўжынёй чатыры сантыметры і дыяметрам два міліметры ўтрымлівае ў сабе рэчыва этанагестрэл (сінтэтычны жаночы гармон, падобны да прагестэрону). Ён дзейнічае ў два спосабы — папярэджвае выйсце яйцаклеткі з яечніка і выклікае змены ў цэрвікальнай слізі, ускладняючы пранікненне сперматазоідаў у матку. Ставіцца на тры гады і дазваляе не думаць пра прыём таблетак па графіку, як у выпадку з аральнымі кантрацэптывамі.
У адрозненні ад камбінаваных таблетак, такі імплант пасуе жанчынам, якія не могуць ці не хочуць прымаць эстрагены. Таксама імплант лічыцца менш траўматычным, з меншай колькасцю пабочных эфектаў на кантрасце, напрыклад, са спіраллю.
Доктар, акушэр-гінеколаг Станіслаў Салавей у каментары «Нашай Ніве» адзначыў, што такія імпланты на сёння лічацца адным з самых эфектыўных відаў кантрацэпцыі, што працуюць выключна прагестынавым гарманальным кампанентам. Але ў Беларусі яны пакуль недаступныя.
«Чаму? Тут можна гэтак жа пытацца, чаму ў нас недаступная імунатэрапія супраць рака. Ці чаму ў нас толькі нядаўна стала даступная ў календары вакцынацыя супраць віруса папіломы чалавека. Наша Мінздароўя трошкі адсталае. А самім вытворцам наш рынак не заўсёды можа падавацца прывабным».
Тэрмін дзеяння такога імпланта — тры гады.
«Але калі мы кажам пра стабільную пару — гэта адно, а калі гаворка ідзе пра розных партнёраў, то гарманальны кантрацэптыў, на жаль, ад інфекцый не бароніць. Таму нават пры яго наяўнасці прэзерватыў ніхто не адмяняе», — звяртае ўвагу акушэр-гінеколаг.
Таксама ён дадае, што якімі б прагрэсіўнымі і прарыўнымі ні былі сучасныя метады кантрацэпцыі, 100-працэнтай абароны ад цяжарнасці не дае ніводны.
Беларуска Паша Джэжора паставіла такі імплант у Польшчы некалькі месяцаў таму. Невялікі стрыжань памерам чатыры сантыметры ўжыўляецца ў руку.
Паша расказвае, што вырашылася на імплант як дадатковую меру бяспекі ў дадатак да прэзерватываў, бо жыве ў Польшчы, дзе на сёння нельга свабодна рабіць аборты. А выехаць за мяжу для працэдуры яна не зможа, бо чакае рашэння па статусу ўцякачкі.
Устаноўка імпланта Implanon NXT у клініцы заняла ўсяго пару хвілін і абышлася дзяўчыне ў 290 даляраў.
«Я баялася, што можа быць балючым укол анестэзіі (мне калолі ў руку звычайны лідакаін), але нічога падобнага. Пасля ўколу мне прамацалі руку і ўсталявалі туды імплант пры дапамозе аплікатара. Гэта нават не было непрыемна — я проста адчула лёгкі рух пад скурай».
Зажыўленне, адзначае суразмоўца, таксама не было балючым — у яе застаўся выключна сіняк, і толькі першы час пры націсканні на руку адчуваўся невялікі дыскамфорт.
Пашу адразу папярэдзілі пра магчымыя пабочкі ў выглядзе дэпрэсіўнага настрою, змены ў лібіда, павелічэнне апетыту. І настроілі не перажываць наконт магчымых лёгкіх крывяністых выдзяленняў цягам месяца.
«Але на справе я амаль не заўважыла ніякіх зменаў. Затое адразу адзначыла плюсы: у мяне ўсё жыццё была пякельна балючая менструацыя — абсалютна любыя месячныя прыводзілі да страты прытомнасці. Цяпер жа месячныя сталі беспакутнымі, я іх нават не заўважаю. Яны ўяўляюць сабой пару кропляў крыві, так што неабавязкова стала карыстацца звыклымі пракладкамі ці менструальнымі чашамі. Плюс палепшылася псіхічнае здароўе: я не трывожуся наконт таго, што, калі выпадкова парвецца прэзерватыў, я зацяжару».
Паша паставіла імплант на рэкамендаваныя тры гады. На большы тэрмін часу ў будучыні разглядае гарманальную спіраль.
«Я глядзела на сябе голую ў люстэрку і казала: «Змірыся!» Люцыя Герашчанка распавяла пра свой досвед з «Азэмпікам»
Беларуская актрыса даведалася пра цяжарнасць толькі на пятым месяцы. Гэта распаўсюджаная з’ява?
«Лаўлю на сабе позіркі людзей сталага ўзросту». Беларуска ў 32 гады наважылася хадзіць з кіем, які быў прапісаны ёй даўно
Цяпер чытаюць
«Пуцін не ведаў, што гэта выльецца ў такую вайну». Галоўнае з інтэрв'ю Лукашэнкі17
Каментары