Кіраўнік дыяспары беларусаў у Крыме выступіў у падтрымку расійскай агрэсіі супраць Украіны
Старшыня рады рэгіянальнай нацыянальна-культурнай аўтаноміі «Беларусы Крыма» Раман Чагрынец выступіў у Мінску з прарасійскімі заявамі, заўважыла «Свабода».
Сярод іншага Раман Чагрынец заявіў, што дзень аб'яднання Крыма з Расіяй нібыта павінен адзначацца і ў Беларусі.
«Дзень уз'яднання Крыма з Расіяй — гэта дзяржаўнае свята ў Расійскай Фэдэрацыі. Мы жывём у агульнай дзяржаве, якая называецца саюзнай, таму я ўпэўнены, што свята важнае не толькі для Крыма і Расіі, а і, вядома ж, для Беларусі. Усё ж Крымская вясна стала паваротным, на мой погляд, момантам у геапалітычным жыцці свету», — сказаў Раман Чагрынец.
Запіс з яго выказваннем апублікавалі ў Telegram-канале «Русский дом в Минске», дзе два дні таму адбыўся круглы стол на тэму «Крымская вясна: досвед інтэграцыі, гуманітарныя, культурныя, палітычныя і эканамічныя аспекты».
Паводле Чагрынца, крымскія падзе 2014 года нібыта зрушылі працэсы па ўсім свеце.
«Свет мяняецца. Так, крымчане прыклалі да гэтага руку. Крым — гэта яскравы прыклад таго, як можна абсалютна без адзінага стрэлу, толькі за кошт рашэння і думкі людзей, вярнуць на радзіму такую вялікую тэрыторыю. Крымчане зрабілі свой выбар, і рэферэндум паказаў, што гэты выбар быў абсалютна правільны», — сказаў кіраўнік крымскай арганізацыі беларусаў.
Чаму заява Чагрынца непраўдзівая
Расія анексавана ўкраінскі паўвостраў Крым і горад Севастопаль у сакавіку 2014 года, калі Украіна была аслабленая працяглымі акцыямі пратэсту супраць рашэння тагачасных уладаў спыніць еўрапейскую інтэграцыю Украіны. Перад гэтым яна ўвяла ў Крым свае войскі і вайсковую тэхніку без апазнавальных знакаў.
Незаконны рэферэндум, што арганізавалі прарасійскія сілы ў Крыме, праходзіў пад кіраўніцтвам з Масквы і пад наглядам узброеных «зялёных чалавечкаў», якія, як пазней прызнаў Пуцін, былі прадстаўнікамі расійскай арміі.
У Кіеве і ў краінах Захаду гэты фіктыўны рэферэндум і анексію Крыма не прызналі.
Падчас незаконных дзеянняў у Крыме ўзброеныя расійскія войскі захапілі органы ўлады, вайсковыя гарадкі і марскія караблі, аэрапорт, іншыя аб’екты.
Падчас штурму парламента Аўтаномнай Рэспублікі Крым загінулі два цывільныя, а калі захоплівалі цэнтр Узброеных сіл Украіны, у Сімферопалі загінулі адзін украінскі вайсковец і адзін цывільны.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне63
Каментары
[Зрэдагавана]